DILI, 29 setembru 2023 (TATOLI)—Primeiru-Ministru (PM), Kay Rala Xanana Gusmão, sesta ne’e simu audiénsia hosi Boxista Profisionál, Manny Pacquiao, hosi Filipina, hodi partilla informasaun ba malu kona-ba lala’ok desportivu, liu-liu modalidade boxing.
“Ha’u iha diskusaun di’ak ho Primeiru-Ministru no nia mós gosta desportu,” Pacquiao hateten hafoin hasoru PM Xanana, iha Palásiu Governu.
Nia dehan, enkontru ne’e ko’alia kona-ba posibilidade iha tinan oin atu loke Manny Pacquiao Promotions (MP Promotions) iha Timor-Leste.
“Ha’u mai iha ne’e hodi hatan ba konvite hosi Timor-Leste, sira konvida atu estadia iha ne’e durante loron-neen maibé tanba ha’u okupadu liu, tanba ne’e labele to’o loron-neen, ha’u mós iha ona ajenda bá nasaun seluk,” nia dehan.
Notísia relevante : Manny Pacquiao planeia promove Boxista Timor-Leste
Aleinde ne’e, Manny Pacquiao sei vizita Klubu Boxista sira iha Dili hodi observa no hodi fó motivasaun.
“Kona-ba desenvolvimentu boxing iha Timor, daudaun ha’u sei ba vizita gym sira no klubu boxista lokál sira hodi hatene oinsá ha’u bele ajuda sira ho motivasaun,” nia akresenta.
MP Promotions, hanesan promosaun ba boxing iha Filipina ne’ebé harii iha tinan 2015 hodi fó apoiu ba boxista foun sira ne’ebé iha mehi a’as no hakarak kompete iha nível mundiál.
Jornalista : Antónia Gusmão
Editora : Julia Chatarina
