CNE prontu kontribui fó susesu eleisaun suku iha Baucau
BAUCAU, 02 outubru 2023 (TATOLI) – Komisaun Nasionál Eleitorál (CNE, sigla portugés) prontu kontribui hodi fó susesu ba eleisaun suku ne’ebé sei realiza fulan-outubru ne’e iha Baucau.
Diretór CNE munisípiu Baucau, Esmeraldo Damião Belo, esplika, oras ne’e hala’o ona koordenasaun ho autoridade administrasaun munisipál Baucau nu’udar na’in no Sekretariadu Tékniku Administrasaun Eleitorál (STAE) hanesan sosializasaun no preprativu tékniku sira.
“Ami prontu koordena no kolabora hodi kontribui ba fó susesu eleisuan suku iha Baucau,” Diretór CNE Baucau hateten iha Vila Nova, segunda ne’e.
CNE Baucau hala’o ona rekrutamentu ba Ofisiál Supervizaun Eleitorál hamutuk na’in-283 no tuir planu sei desloka ba kada suku no aldeia iha Baucau liuliu hala’o verifikasaun ba lista kandidatura no superviziona ba prosesu kampaña to’o loron eleisaun.
Esmeraldo Belo, argumenta, lalaok eleisaun suku diferente ho eleisaun parlamentár no prezidensiál maibe papél CNE sei apoia téknika, liuliu superviziona lala’ok eleisaun, hahú to’o eleisaun remata hanesan prevene mosu krime eleitóral no aprovasaun ba kandidatura ne’ebé manán tuir rezultadu eleisaun.
Munisípiu Baucau tuir planu sei realiza eleisaun iha suku hamutuk 62 hafoin iha tinan-ne’e aumentu suku foun tolu hosi totál postu administrativu neen hanesan Baucau Vila, Baguia, Laga, Quelicai, Venilale no Vemasse.
Notísia relevante: Ofisiál supervizaun eleitorál 283 sei apoia eleisaun suku iha Baucau
Jornalista : Natalino Belo
Editór : Evaristo Soares Martins
