FM husu Governu hadi’a prosesu pensaun ba membru PNTL reformadu 158
DILI, 03 outubru 2023 (TATOLI)—Diretór Fundasaun Mahein (FM), Nelson Belo, husu IX Governu Konstitusionál presiza hadi’a prosesu pensaun mensál ba membru PNTL reformadu 158, atu nune’e bele hetan pensaun.
“Sira iha direitu atu moris ho dignu tanba sira dedika sira-nia moris tomak atu serbí nu’udar polísia,” Nelson Belo hateten ba Agência Tatoli iha Gricenfor, tersa ne’e.
Nia hateten, Governu iha responsabilidade atu trata sira ho dignidade tuir kuadru legál, nune’e Governu mós tenke foka liu ba tratamentu ne’ebé sira halo ho idade reformadu tinan 60.
Tuir deklarasaun ne’e, ema-ne’ebé simu pensaun mensál ne’e sei tun tanba sira-nia idade boot, no períodu ne’ebé profisionál sira hanesan ne’e hetan ona estatutu ativu ba remunerasaun, feriadu, avansu, promosaun no reforma.
Tanba ne’e, nia hateten, polítika IX Governu Konstitusionál nian mak atu reativa ofisiál Polísia Nasionál Timor-Leste (PNTL) reformadu 158 ne’ebé hetan ona pensaun mensál dezde 26 junu 2023.
“Ita respeita no apresia polítika IX Governu Konstitusionál nian atu reativa fali ofisiál PNTL reformadu 158 ne’ebé reforma ona. Maibé, ami rekomenda ba Governu atu halo revizaun no alterasaun ba dekretu-lei sira hodi fó pensaun ba membru PNTL reformadu sira atu moris ho dignidade, ” nia dehan.
Jornalista : Osória Marques
Editór : Cancio Ximenes
