PNTL-VPU Bobonaro rejista kazu violénsia hamutuk 45
DILI, 04 outubru 2023 (TATOLI)—Primeiru Sarjentu, Xefe Sub-Seksaun Polísia VPU Muisípiu Bobonaro, Elvira Tavares, dehan durante fulan-janeiru to’o mai iha agostu nia rohan tinan 2023 PNTL-VPU rejista kazu violénsia iha munisípiu Bobonaro hamutuk 45.
“Hosi janeiru mai to’o fulan-agostu nia rohan, ita rejista kazu 45 ne’ebé kompostu hosi krime violénsia doméstika ofensa iguldade simples hamutuk 40, abuzu seksuál menór iha rua (2) no kazu koasaun sosiál iha rua (2) no mós kazu aktu adolesente iha ida (1),” nia dehan iha serimónia “Forun Feto iha Karreira Jurídika” iha Hotel Timor, Dili, kuarta ne’e.
Kona-ba prosesu, nia esplika, prosesu sira-ne’e hotu rejista ona iha Ministériu Públiku nian, sira kontinua halo advokásia ba vítima sira tanba papel polísia VPU nian mak atu asegura no prefere ba uma mahon sira no akompaña hela sira-nia prosesu legál iha Ministériu Públiku.
Xefe Sub-Seksaun Polísia VPU dehan, ida-ne’e papel importante ne’ebé mak polísia VPU halo no asegura vítima feto, labarik no ema ho defisiénsia inklui portadora/o sira no mós ema vulnerável tebes.
Nia dehan, VPU la servisu mesak mai servisu hamutuk ho rede referál sira no rede referál sira mak sei fó apoiu asisténsia ba vítima.
“Ho asegura ba vítima ne’e ita hasoru dezafiu sira mak vítima vulnerável área rural. VPU hasoru problema ne’e la’ós para ho ida-ne’e, maibé ami koordena ho autoridade lokál hamutuk ho rede referal sira, atu oinsá asegura vítima sira no oinsá ita ajuda transporta ba munisípiu no foti relatóriu liga vítima nian depois haruka ba Ministériu Públiku,” nia hateten.
Jornalista : Osória Marques
Editór : Cancio Ximenes
