Governu Austrália introdús polítika dezenvolvimentu internasionál ba parseiru iha TL
DILI, 06 outubru 2023 (TATOLI)–Governu Austália liuhosi Enkarregadu Negósiu hosi Departamentu Negósiu Esttranjeiru Austrália (DFAT, sigla inglés), Caitlin Wilson, introdús Austrália nia Polítika Dezenvolvimentu Internasionál foun ba parseiru sira iha Timor-Leste.
Nia hatutan, polítika ne’e deskreve ho klaru kona-ba Austrália nia kompromisu atu servisu ba programa dezenvolvimentu sira ho kualidade aas, hodi kontribui ba objetivu sira-ne’ebé fahe hamutuk.
Austrália mós, nia dehan, komprometidu ba programa dezenvolvimentu ne’ebé sei halo diferénsa reál ne’ebé apoiu Timor-Leste nia prioridade sira iha kontestu dezafiu globál agora.
“Polítika foun ida-ne’e hanesan oportunidade ba Austrália ho Timor-Leste atu haree fila-fali no adapta ho respeitu iha parseria dezenvolvimentu ida-ne’e. Ami sei kontinua hametin parseria ida-ne’e ho respeitu, rona-malu no aprende hamutuk. Orientasaun sira-ne’ebé fó sai iha Polítika Dezenvolvimentu Internasionál foun ida-ne’e aliña ona ho dalan abordajen dezenvolvimentu tuir nasaun ida-idak nian ho klaru,” Caitlin Wilson hateten asuntu ne’e iha lansamentu Austrália nia Polítika Dezenvolvimentu Internasionál ba parseiru sira iha Timor-Leste, iha Sky Bar, Timor Plaza, ne’ebé Agência Tatoli asesu, sesta ne’e.
Durante ne’e, nia hateten, Austrália sempre hamriik iha oin hodi fó apoiu internasionál ba Timor-Leste, dezde Timor-Leste hetan independénsia iha tinan 2002 no kontinua sai Timor-Leste nia parseria dezenvolvimentu ne’ebé boot liu hotu.
Sekretária Estadu Igualdade (SEI), Elvina Sousa Carvalho, sente orgullu no onradu tebes hodi partisipa iha lansamentu ida-ne’e.
Nia hateten, Timor-Leste ho Austrália nu’udar belun di’ak no sai parseiru ida-ne’ebé mak bele kontribui nafatin ba Timor-Leste nia estabilidade, pás no prósperu iha futuru.
Lansamentu ne’e partisipa mós hosi Ministru Negósiu Estranjeirus no Kooperasaun, Bendito dos Santos Freitas, Vise-Ministra Finansas, Felicia Claudinanda da Cruz Carvalho, Sekretária Estadu Igualdade (SEI), Elvina Sousa Carvalho, ne’ebé akompñadu hosi Diretór Jerál SEI, Armando da Costa.
Jornalista : Osória Marques
Editór : Cancio Ximenes
