PM Xanana partisipa iha ‘gala dinner’ oferese hosi Estadu Indonézia
BALI, 10 outubru 2023 (TATOLI)—Primeiru-Ministru (PM), Kay Rala Xanana Gusmão, partisipa iha ‘gala dinner’ ne’ebé oferese hosi Estadu Repúblika Indonézia ba partisipante Archipelagic and Island States Forum (AIS Forum) ka Fórum Estadu Arkipelájiku iha área Nusa Dua, Bali, Indonézia, tersa ne’e, tuku 18:30 kalan.
Durante simu bainaka, Prezidente Repúblika Indonézia, Joko Widodo ‘Jokowi’ agradese ba partisipasaun Primeiru-Ministru, Kay Rala Xanana Gusmão no líder rai seluk.
Notísia relevante : PM Xanana no delegasaun to’o ohin iha Bali
Xanana Gusmão partisipa eventu ne’e uza roupa modelu teselajen Endek Bali, ne’ebé bainhira tama iha odamatan boot, simu ho parade militár no kontinua ba kaer liman ho Prezidente Jokowi no Ministra Negósiu Estranjeiru, Retno Marsudi.
“Bem-vindu mai Bali no Bem-vindu mai Indonézia hodi partisipa iha konferénsia nível a’as no serimónia gala dinner AIS Forum,” Prezidente Jokowi hato’o akompaña ho kaer liman PM Xanana.
Biban ne’e, Prezidente Jokowi simu mós Primeiru-Ministru Niue, Dalton Tagelagi, Prezidente Mikronésia Wesley Simina, Primeiru-Ministru, São Tome e Príncipe, Partice Emery Trovoada, Primeiru-Ministru Tuvalu, Kausea Natano, Vise Primeiru-Ministru Fiji, Manoa Seru Nakausabaria Kamikamica no Primeiru-Ministru Tonga Samiu, Kuita Vaipulu.
Konferénsia nível a’as ne’e sei realiza iha loron 11 outubru 2023, ne’ebé sei partisipa hosi Xefe Governu nasaun 30, reprezentante hosi nasaun Arkipelájiku no illa kiik hamutuk 51 inklui organizasaun internasionál haat ne’ebé durante ne’e servisu iha área ekonomia azul.
Enkontru nível a’as ne’e sei foka ba asuntu glabál haat hanesan, mitigasaun ba mudansa klimátika, ekonomia azul, sistema tratamentu lixu plástiku iha tasi no sistema kontrolu marrítima.
Fórum Estadu Arkipelájiku nu’udar ponte kooperasaun entre nasaun arkipelájiku no illa kiik sira iha mundu, ne’ebé ho objetivu atu hametin kolaborasaun hodi hasoru problema globál sira, liu-liu dezenvolvimentu tasi.
Jornalista : Antónia Gusmão
Editora : Julia Chatarina
