Reabilitasaun estrada rejionál hosi Nunuheno ba suku Taiboko atinje 30%
OÉ-CUSSE, 11 outubru 2023 (TATOLI – Progresu servisu ba reabilitasaun estrada rejionál ho distánsia kilómetru 14, hahú hosi Nunuheno, suku Cunha envolve aldeia Usapibela, suku Lalisuk to’o suku Taiboko, sub-rejiaun Pante Makasar, daudaun ne’e atinje ona 30%.
“Ia hamutuk ho tékniku sira hosi obra publika no kompañia ita ba halo fiskalizasaun, agora to’o ona 30%,” Prezidente Autoridade RAEOA, Arsénio Paixão Bano ba Tatoli iha Oé-Cusse, kuarta ne’e.
Nia informa, reabilitasaun estrada rejionál hanesan ne’e faze dahuluk, maibé futuru, sei kontinua to’o sub-rejiaun Nítibe, liga ba suku Lela-Ufe liuliu aldeia Mahata hodi liga direita ba ponte Noetoko.
“Fiskalizasaun ne’e atu haree direita progresu servisu projetu reabilitasaun estrada rejionál ne’ebé atinje ona 30%, hatudu progresu di’ak hodi fasilita asesu populasaun hosi Sub-rejiaun Nitibe ba vila, tanba planu hodi autoridade iha tinan oin (2024) ita sei sei kontinua estrada to’o Suku Usitako, sub-rejiaun Nítibe,” nia akresenta.
Entretantu, kompañia Lifau Indah Unipesoál Lda ezekuta projetu reabilitasaun estrada rejionál kompleta ho dreinazen no ponte sira.
Valór kontratu ba projetu ne’e hamutuk $738,204,15, orsamentu ne’e Autoridade RAEOA foti hosi Orsamentu Jerál Estadu (OJE) 2023, ho durasaun servisu fulan sia (9), huhú iha loron 03 juñu 2023 sei termina iha loron 03 abríl 2024.
Notísia relevante: Autoridade RAEOA hatuur fatuk dahuluk reabilita estrada rejionál Nunuheno ba Taiboko
Jornalista: Abílio Elo Nini
Editór: Evaristo Soares Martins
