BAUCAU, 17 outubru 2023 (TATOLI) – Komandu Polísia Nasionál Timor-Leste (PNTL) munisípiu Baucau bandu estudante finalista komboiu motorizada hafoin tuir ezame nasionál.
Komandante PNTL Baucau, Superintendente Xefe Antoninho Mauluta, esplika, liuhosi koordenasaun entre Serbisu Munisipál Edukasaun ho PNTL fo-sai ona sirkulár ba jestór kada eskola hotu atu informa estudante sira atu ezame nasionál remata tenke fila ba uma ho kondisaun hakmatek no labele halo perturbasaun orden públiku.
“Komandu foti ona desizasaun no orienta liuhosi komandante operasaun katak loron ikus sei koordena ho Batallaun Orden Públiku (BOP) sei blokeia dalan,” Komandante PNTL Baucau hateten iha Vila Nova, tersa ne’e.
PNTL Baucau simu informasaun hosi edukasaUn Baucau ligadu ho atividade komboiu ne’ebé sempre akontese hafoin loron ikus ezame nasionál nune’e parte seguransa sei halo vijilánsia másimu no bainhira hetan estudante halo komboiu sei halo apreensaun ba motorizada tuir dekretu lei kódigu estrada.
PNTL Baucau deside destaka membru iha sentru realizadór no destaka ekipa movel hodi patrulla tuir rute ne’ebé planeia hodi asegura prosesu ezame nasionál iha munisípiu Baucau.
“Ita-nia operasaun sei instala hela maibé identifika ona eskola ne’e bé sempre halo problema, dalan ita sei blokeia,” Superintendenti Xefe Mauluta akresenta.
Eis komandante munisípiu Bobonaro hato’o mensajen ne’e ba estudante sira iha atu kuida no hanoin ba futuru tanba ezame nasionál la’ós ikus maibé prova atu hakat tán pasu ida ba oin nune’e bainhira ezame remata fila ba uma ho hakmatek hodi hein rezultadu.
Tuir dadus, totál estudante ne’ebé partisipa ezame nasionál iha Baucau hamutuk 5.851, komposta ensinu sekundária 2.390, tékniku vokasionál 236 no ensinu báziku 3.225 hosi totál sentru realizadora 37.
Notísia relevante: Estudante 5000-resin iha Baucau sei tuir ezame nasionál
Jornalista : Natalino Belo
Editór : Evaristo Soares Martins
