ONU introdús prosesu finansiamentu ba ONG iha Timor-Leste
DILI, 26 Outubru 2023 (TATOLI)–Organziasaun Nasaun Unida (ONU) liuhosi UN Woman hamutuk ho Forum ONG Timor-Leste (FONGTIL), kinta ne’e, hala’o diálogu ida atu introdús prosesu finansiamentu ba Organizasaun Naun Governamentál sira (ONG) iha Timor-Leste.
Diretór Ezekutivu FONGTIL, Valentim da Costa Pinto, hateten sorumutu ne’e hanesan kontinuasaun ba diálogu ne’ebé hala’o iha fulan-jullu liubá hodi ko’alia ho ONG sira.
“Iha prezensa atu ajuda membru ONG sira atu hatene saida mak sira bele halo hodi kumpre kritériu sira-ne’ebé elijivél atu simu fundu hosi doadór sira. Tanba, buat ne’ebé ita hatene mak ONU rasik la’ós doadór maibé sira mak instituisaun ida-ne’ebé doadór sira tau fiar atu implementa programa sira ho orsamentu ne’ebé fornese ona,” nia hateten iha Delta Nova, kinta ne’e.
Iha diálogu ida-ne’e, ONU esplika oinsá ONG lokál sira bele kontinua programa sira-ne’ebé eziste sein prezensa ONU nian, ida-ne’ebé mak programa The Global Spotlight Initiative atu halakon violénsia hasoru feto no labarik-feto sira iha Timor-Leste.
“Tinan kotuk ami foka liu ba atividade Spotlight iha kolaborasaun ho UN Women no programa ne’e sei ramata iha outubru nia rohan no ami hakarak atu kontinua programa ne’e. Maibé, ita labele kumpre kritériu sira hanesan parseiru atu hetan doadór direta, tanba ne’e ita tenke forma aliansa ho instituisaun ONU nian sira,” nia esplika.
Prosesu atu hetan finansiamentu hosi doadór sira, organizasaun naun-lukru sira bele halo tuir kritériu xave sira hanesan define ho klaru misaun no meta sira, iha evidénsia kona-ba susesu iha estrutura governasaun ne’ebé forte, fornese informasaun detalladu kona-ba orsamentu no finanseiru no oferese rekoñesimentu.
Xefe Reprezentante Organizasaun Nasaun Unida (ONU) iha Timor-Leste, Funmi Balogun, hateten Nasaun Unida rasik forma bazeia ba fundu no tanba fundu ne’ebé sei obriga organizasaun barak-liu ka menus atu taka.
“Ita hetan rekursu hosi nasaun membru no ONG sira-ne’ebé hakarak kontinua hala’o sira-nia kna’ar tenke aprende atu dezenvolve sira-nia aan. Hatudu sira-nia dezempeñu, atu nune’e nasaun doadór sira bele fornese rekursu hirak-ne’e,” nia dehan.
ONU hetan fundu hosi doadór sira liuhosi kontribuisaun voluntáriu hosi nasaun membru sira, doasaun hosi organizasaun naun-governamentál sira, instituisaun privadu sira no individuál sira, nune’e mós finansiamentu hosi programa projetu espesiál sira-ne’ebé finansia hosi ajénsia ONU sira.
Fundu ida-ne’e importante atu asegura kontinuidade operasaun Organizasaun Nasun Unida (ONU) nian no apoia ninia programa sira iha área oioin.
Jornalista : Osória Marques
Editór : Cancio Ximenes
