BAUCAU, 26 outubru 2023 (TATOLI) – Sekretariadu Tékniku Administrasaun Eleitorál (STAE) munisípiu Baucau finaliza ona pakotementu ne’ebé hala’o durante loron-tolu.
Diretór STAE Munisípiu Baucau, Natividade Freitas, esplika, hafoin transporta materiál hosi nasionál, prosesu pakotementu hala’o iha loron-tersa, 24 outubru hahú ho postu rua hanesan Vemase no Baucau vila, enkuantu loron daruak postu Venilale ho Quelicai no ohin ramata ho postu Laga ho Baguia.
“Ema ne’ebé mai halo pakotementu ne’e maihosi pesoál STAE apoia suku kada suku ema ida no PSAA (Pesoál STAE apoia Aldeia) tanba koloka iha aldeia,” Diretór STAE Baucau hateten iha Vila nova, kinta ne’e.
Durante pakotementu ekipa hasoru fallansu buletin ezemplu mak limitadu maibé konsege rezolve nune’e prosesu lao kontinua to’o ohin finaliza ho tuir planu aban sei kontinua distribui ba kada sentru votasaun.
Responsavél ba materiál mak PSAS no PSAA ne’ebé reprezenta STAE Munisípiu nune’e bainhira materiál to’o iha sentru votasaun sei kontinua halo esplikasaun ba ofisiál meza asembleia suku no aldeia antes realiza eleisaun.
“Sira sei apoia tékniku ba ofisiál meza hamutuk na’in-tolu hanesan funsaun hosi materiál eleisaun,” Natividade Freitas akresenta.
Materiál ne’ebé halo pakotementu mak hanesan buletin votu xefe suku no aldeia, lapizeira, kadernu, banner no seluktan inklui sei kompleta tan fiu no lampu antes transporta ba kada sentru votasaun.
Eleisaun lideransa komunitária iha munisípiu Baucau hamutuk sentru votasaun 281 hosi suku 59 ho totál vontante hamutuk rihun-99 resin hosi tótal kandidatura hamutuk 243.
Notísia relevante:Livru buletin votu Baucau nian to’o ona, aban halo pakotementu
Jornalista : Natalino Belo
Editór : Rafael Ximenes de A. Belo
