Ahi han mutuk uma ida iha Ritabou
BOBONARO, 27 outubru 2023 (TATOLI)-iha sesta maizumenus tuku 13:00 meodia ahi han mutuk uma ida iha aldeia Ma-hui, suku Ritabou, postu administrativu Maliana, munisípiu Bobonaro.
Uma-Nain Carolina Maia Vicente, informa sira la hatene motivu hosi insidente ne’e tanba akontese sira laiha uma.
Notísia relevante: Domingas ho oan na’in-lima helik iha ‘uma dodok’ nia okos
“Ha’u tein hela etu iha dapur hasai tiha ahi, ha’u ho labarik na’in-rua ba fase ropa iha mota, foin fase no halai ba dehan ahi han uma. Ami te’in hahan mos la han tan,” nia informa ba Jornalista sira iha fatin akontesimentu.
Akontesimentu ne’e la konsege salva motorizada ida, osan $800 no sasan uma laran la konsege salva, daudaun ne’e uma na’in hela de’it ho ropa isin-lolon.
“Ha’u husu ba Governu atu tau-matan ba uma ida-ne’e, tanba ami laiha ona kbiit atu halo uma foun, agora buat ida de’it mos laiha,” Carolina ko’alia ho triste.
Xefe aldeia Mahui, Aleixo Mau Leto, reforsa viziñu sira la konsege hamate ahí tanba maioria okupadu hotu ho atividade eleisaun suku nian iha sede aldeia Mahui.
“Sira balu mai ne’e ahi haan makas ona, entaun sira konsege telefoni ba Bombeirus mai rega, maibé hansan hamate de’it ona ahi uma ne’e buat ida laiha,” nia katak.
Xefe aldeia ne’e rekomenda ba parte kompetente atu halo intervensaun imediata.
“Sira lakon ona uma, signifika buat hotu lakon ba sira, aban ho bainrua ne’e estadu bele tau matan, estadu presiza aselera konstrui fali sira-nia uma tanba sira presiza tebes,” nia rekomenda.
Uma bebak ne’e medida 6X6 ne’e nuudar eransa hosi inan-aman ne’ebé mate ona entre tinan 2017 no 2021.
Enkuantu uma ne’e konstrui 2003 liuhosi konstribuisain família no viziñu sira ne’ebé apoia kalen ho ai.
Família iha una laran ne’e hamutuk ema na’in-lima kompostu hosi Carolina Maia Vicente ho nia kaben hamutuk ho oan na’in-rua inklui nia alin feto ida ho kondisaun defisiénsia matan.
Notísia relevante: SEPS apoia materiál konstrusaun ba uma-kain 51 iha Bobonaro
Jornalista: Sérgio da Cruz
Editór: Evaristo Soares Martins
