DILI, 30 outubru 2023 (TATOLI)-–Ministru Interiór (MI), Francisco da Costa Guterres, konsidera, membru Polísia Nasionál Timor-Leste (PNTL) balun ho konsiénsia utiliza transporte públiku hodi fó seguransa ba Eleisaun Órgaun Suku iha loron 28 outubru liubá ne’e normál.
“Ha’u mós tenke haree ami-nia kapasidade tanba mobilizasaun ba suku 446, enkuantu Polísia nia kapasidade ne’e la to’o hodi kobre hotu suku sira ne’e, tanba ne’e maka membru sira sente katak ida-ne’e sira-nia obrigasaun ida atu hala’o misaun entaun sira ba rasik, ita tenke louva ida-ne’e,” Ministru Francisco hateten hafoin ramata aprezentasaun Orsamentu Ministériu Interiór tinan 2024 iha ámbitu Komité Revizaun Orsamentu, iha auditoriu Ministériu Finansa, Aitarak-laran, segunda ne’e.
Notísia relevante : PNTL sei fó seguransa másima ba eleisaun lideransa komunitária
Nia dehan, membru PNTL balun insatisfeitu ne’e kestaun seluk tanba sira tenke halo sira-nia obrigasaun, tanba ne’e dever ida-ne’ebé kumpre ba nasaun.
“Hanesan ita sira ne’e hotu nasaun kuandu presiza ita tenke ba. Ita la persiza husu ba nasaun katak nasaun fó saida ba ita maibé ita tenke husu ba ita-nia an katak fó saida ba nasaun, hanesan membru eskollidu PNTL saida mak fó ba nasaun entaun tenke servisu iha kualker oras, la persiza ezije barak, ida-ne’e mak sira halo hela, ida ka rua mak la kontente maibé restu kontente,” nia akresenta.
Nune’e, Ministru Interiór husu ba membru PNTL sira balun bainhira lakohi serbisu bele sai, tanba nu’udar seguransa nasaun tenke kumpre de’it dever no labele ezije.
Jornalista : Antónia Gusmão
Editora : Julia Chatarina
