Governu konvida membru CPLP-ASEAN partisipa komemorasaun loron proklamasaun 28 Novembru
DILI, 31 outubru 2023 (TATOLI)—Prezidente Komisaun Organizadora, Tomás Cabral, hateten Governu sei konvida bainaka importante hosi estranjeiru atu partisipa iha komemorasaun loron proklamasaun independénsia 28 Novembru ba dala-48 ne’e.
Notísia Relevante: Konsellu Ministru aprova tema ba komemorasaun 28 novembru ba dala-48
Liuhosi reuniuan intermeinisteriál, Presidente Komisaun Organizadora, Tomás Cabral, anúnsia formalmente tema tema ba komemorasaun loron prolamasaun independénsia 28 novembru ho tema “Selebrar a Istória Construir o futuro”.
“Komemorasaun 28 novembru ne’e sei partisipa mós bainaka importante balun hosi nasaun membru CPLP no nasaun membru ASEAN sei hola parte iha komemorasaun loron istóriku ne’e,” Prezidente Komisaun Organizadora, Tomás Cabral, hateten liuhosi nota imprensa ne’ebé Agência Tatoli asesu, tersa ne’e.
Tanba ne’e, nia apela ba xefe seksaun responsável sira atu koordena servisu ho másimu no responsabilidade tuir tarefa servisu ne’ebé kada seksaun simu ona, nune’e komemorasaun ne’e bele ho di’ak to’o eventu ramata.
Iha komemorasaun 28 novembru ne’e sei hahú iha tuku 08h00 no sei ramata iha tuku 10h00 dadeer ne’ebé sei halo transmisaun direta liuhosi kanál Rádio Televizaun Timor-Leste (RTTL) ho Grupu Mídia Nasionál (GMNTV).
Ba tinan ida-ne’e, sei komemora ho feira nasionál iha Dili ne’ebé sei responsabliza hosi parte Ministériu Komérsiu Indústria, atividade desportiva ne’e sei organiza hosi Ministériu Kultura Desportu no sei iha mós marsa saúdavel ne’ebé sei organiza hosi Palásiu Prezidensiál.
Orsamentu ba komemorasaun loron proklamasaun independénsia 28 novembru ba dala-48 (28 novembru 1975-28 novembru 2023) ba tinan ne’e, Governu aloka rihun $350.
Jornalista : Osória Marques
Editór : Cancio Ximenes
