Uza veíkulu Estadu ba interese privadu, PNTL Oé-Cusse halo apreensaun motorizada ualu

OÉ-CUSSE, 31 outubru 2023 (TATOLI – Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), halo apreensaun ba motorizada ualu ho xapa-matríkula Estadu hosi funsionáriu públiku balun tanba uza liuhosi oras servisu ba interese privadu.

Notísia relevante:MF introdús matéria haat iha Oé-Cusse bá polítika jestaun patrimóniu Estadu

Komandante PNTL Oé-Cusse, superintendente, Nicolau Francelino da Costa, hateten, antes ne’e, autoridade RAEOA servisu hamutuk ho ekipa konjunta komposta hosi, Polísia Nasionál Timor-Leste (PNTL) Komisaun Anti Korupsaun (CAC, sigla portugés), Provedoria Direitu Umanu no Justisa (PDHJ), Sekretáriu Rejionál ba Asuntu Finansa liuhosi Diresaun Rejionál Patrimóniu Estadu, Departamentu Rejionál Transporte Terrestre (DRTT) no Sekretáriu Rejionál Asuntu Administrasaun liuhosi Komisaun Funsaun Públika (KFP), atu kontrola sirkulasaun veíkulu Estadu iha Oé-Cusse.

Ekipa prende (halo apreensaun) motorizada lima iha loron 22 ne’e, PNDS tolu, sira ligasaun estranjeiru motorizada ida no MSSI nian ida, mai to’o loron 24 outubru 2023 ne’e prende tán motorizada tolu maioria PNDS nian, agora ualu ona,” Nicolau Francelino da Costa, ba jornalista sira iha Oé-Cusse, segunda ne’e.

Autoridade másimu seguransa Oé-Cusse ne’e, informa, ekipa konjunta ne’e, hala’o atividade ne’e bazeia sirkulár ofisiál ida, ho númeru 001 Gabinete Primeiru Ministru/10/2012 kona-bá kontrola movimentu viátura Estadu no Lei númeru 80/2022,  atu funsionáriu públiku no  kargu xefia sira, iha instituisaun públiku tenke estasiona ka para ona veíkulu Estadu sira iha  edifisíu oin ka servisu fatin.

“Ne’ebé motor sira-ne’e, parte sesaun tranzitu identifika no aplika sansaun multa tuir lei, no na’in rasik ba selu direita iha banku, ne’ebé to’o agora motorizada neen maka selu ona ba kofre Estadu ho koima $260,00 hela motorizada rua mak seidauk selu no para hela iha kuartel PNTL Oé-Cusse,” nia informa.

Nia esplika, motorizada hirak-ne’e halo movimentasaun liu oras servisu, tan ne’e hosi komandu Rejionál koopera ho autoridade relevante sira, hodi kria ekipa konjunta para halo prevensaun ba veíkulu Estadu sira iha territóriu Oé-Cusse.

Tanba iha deklarasaun ofisiál hosi ekipa konjunta ne’e, sita katak, veíkulu Estadu sira uza só iha oras servisu de’it, karik liu oras servisu, ekipa husu razaun no justifikasaun, iha karta autorizasaun ka la’e.

“Karik laiha objetivu klaru, karta justifikasaun ruma, ekipa konjunta prende, nune’e bele evita má-gastus ne’e,” nia  fó hanoin

Nune’e Autoridade seguransa másimu iha RAEOA, apela  ba funsionáriu sira-ne’ebé maka servisu iha territoriu Oé-Cusse, presiza koopera ho parte ekipa konjunta liu-liu PNTL, atu kumpri regra ne’ebé públika ona hosi Governu, nune’e bele evita, bainhira halo movimentu ba fatin ruma liu oras servisu ka feriádu laiha karta autorizasaun, di’akliu uza transporte privadu.

Notísia relevante:Hahú ohin, veíkulu Estadu sira iha Oé-Cusse ‘para’ hotu iha edifísiu

Jornalista: Abílio Elo Nini

Editór: Evaristo Soares Martins