OÉ-CUSSE, 20 outubru 2023 (TATOLI – Autoridade RAEOA liuhosi Sekretária Rejionál Asuntu Finansa, sesta ne’e, hasai ona sirkulár ho númeru 001 Gabinete Primeiru Ministru/10/2012 kona-bá kontrola movimentu viátura Estadu no Lei númeru 80/2022, atu funsionáriu públiku no kargu xefia sira, iha instituisaun públika tenke estasiona ka para ona veíkulu Estadu sira iha edifisíu oin ka serbisu-fatin. .
Notísia relevante: Utiliza veíkulu Estadu, Presiza halo rasionalizasaun no poupa despeza Estadu
Iha konferénsia imprensa, Sekretária Rejionál Asuntu Finansa, Maria Eliza Maniquin, informa pedidu kona-bá ekipa konjunta monitorizasaun bazea ba Lei númeru 80/2022 nian, katak funsionáriu públiku kargu xefia, kargu diretór sira, hetan ona subsídiu transporte hosi Governu.
Tan ne’e Autoridade servisu hamutuk ho ekipa konjunta komposta hosi, Polísia Nasionál Timor-Leste (PNTL) Komisaun Anti Korupsaun (CAC, sigla portugés), Provedória Direitu Umanu no Justisa (PDHJ), Sekretáriu Rejionál ba Asuntu Finansa liuhosi Diresaun Rejionál Patrimóniu Estadu, Departementu Rejionál Transporte Terrestre (DRTT) no Sekretáriu Rejionál Asuntu Administrasaun liuhosi Komisaun Funsaun Públika (KFP).
“Ekipa konjunta mak sira halo monitorizasaun, fiskalizasaun ba iha viátura Estadu iha territóriu RAEOA, ne’ebé hahú hosi oras servisu depois oras servisu tuir prosedimentu ne’ebé iha,” Maria Eliza Maniquin, informa liuhosi konferénsia imprensa iha otél Ambeno.
Hakarak informa, katak bainhira hala’o viajén ba servisu ruma iha terrenu, presiza ordén servisu autorizasaun mai hosi Prezidente Autoridade nu’udar superiór másimu iha RAEOA ka Sekretáriu Rejionál ne’ebé tutela bá.
“Ida-ne’e ita bo’ot sira nu’udar funsionáriu públiku no servidór Estadu, ita tenki tane aas Lei ne’ebé haruka,” nia fó-hanoin.
Nune’e nia enkoraja funsionáriu públiku tomak, ne’ebé maka destakadu iha RAEOA, katak ekipa konjunta sei hahú hala’o nia misaun hodi halo monitórizasaun no fiskalizasaun ba viátura Estadu sira iha territóriu RAEOA.
Tuir nia, baze ba ida-ne’e, haktuir iha Dekretu-Lei númeru 80/2022 kona-bá regulamentu viátura Estadu, Dekretu-Lei númeru 6/2003, kona-bá kódegu estrada sirkulár númeru 3 Gabinete Primeiru Ministru/3/2009, kona-bá jestaun téknika karreta Estadu, iha sirkulár númeru 001 Gabinete Primeiru Ministru/10/2012 kona-bá kontrola movimentu viátura Estadu.
“Relasiona ho baze legál mensiona ona, katak viatura Estadu depois remata servisu, sei para hotu iha servisu fatin ka edifísiu oin iha kada instituisaun, laiha autorizasaun atu lori ba uma, festa, fin de semana no loron feriadu,” nia apela.
Nia informa, durante iha monitorizasaun ekipa konjunta sei prende viátura Estadu, sei lori ba komandu PNTL atu submete prosesu tuir infrasaun sira-ne’ebé komete no laiha pontu toleránsia.
“Informasaun ida-ne’e hahú ohin ba oin ita tenki kumpri. Informasaun ne’ebé hasai tiha ona, husu ba funsionáriu públiku sira, no entidade tomak atu kumpri saida mak ohin hasai ona,” nia insiste.
Notísia relevante: MF introdús matéria haat iha Oé-Cusse bá polítika jestaun patrimóniu Estadu
Iha biban hanesan, Adjuntu Segundu Komanda PNTL Oé-Cusse, Inspetór Xefe, Angelo Quelo, reforsa-tan, monitorizasaun ne’e la’ós valé de’it ba funsionáriu Oé-Cusse maibé valé mós ba funsionáriu iha territóriu nasionál bainhira viajén ofisiál mai Oé-Cusse.
“Tanba dalabarak maluk balun mai hosi Dili lori karreta Governu konforme sira uza ba interrese privada barakliu no uza ba festa no implika ba despeza Estadu, tan ne’e ekipa konjunta sei halo asaun bainhira hetan,” nia nia fó-hanoin.
Kona-bá kaléndariu operasaun, ekipa konjunta sei la públika sai ba públiku, maibé ekipa sei halo operasaun tuir tempu ne’ebé iha.
“Atividade ne’e ita la’os konsentra de’it iha vila laran maibé sei asesu to’o nivél suku no aldeia sira iha territóriu Oé-Cusse liu-liu ba utilizasaun viátura Estadu ba motorizada no karreta,” nia afirma.
Entretantu, tuir dadús Agência Tatoli iha Diresaun Rejionál Patrimóniu Estadu, totál patrimóniu daudaun ejiste iha O’e-Cusse kabe ba divizaun ualu (8) iha Sekretáriu Rejionál sira no Gabinete Prezidente Autoridade, ba karreta Estadu iha 92 no viátura ba membru Autoridade iha 11 ho motorizada hamutuk 182.
Notísia relevante: Ekipa konjunta nota ministériu balun utiliza viatura Estadu ba interese privadu
Jornalista: Abílio Elo Nini
Editór: Rafael Ximenes de A. Belo
