Joven sira presiza dignifika lutadór sira-nia luta hodi kontribui ba pás
DILI, 06 novembru 2023 (TATOLI)–Prezidente Komité 12 Novembru (C12N), Gregório Saldanha, hateten iha komemorasaun loron nasionál juventude iha 12 novembru ida-ne’e joven sira presiza valoriza no dignifika lutadór sira-nia luta hodi kontribui ba pás no estabilidade ba rai doben ida-ne’e.
“Komemora 12 novembru ne’e atu fó valór ba ita-nia lutadór sira tanba sira-nia luta mak ohin loron ita goza ukun rasik-aan. Ita tenke respeita no valorize sira-nia luta. Hanesan daudaun, ita-nia joven ne’ebé mak halo krime ne’e signifka la fó valór ba sira. Tanba ne’e, husu ba joven sira hotu atu lalika tan fakar raan entre joven timoroan, husik rezisténsia mak vítima no lakon vida ba rai ida-ne’e. Nune’e, di’ak-liu utiliza tempu ne’e hodi moris di’ak no kontribui ba dezenvolvimentu ba rai ida-ne’e,” nia dehan ba jornalista sira hafoin halo abertura ba kongresu nasionál C12N ba datoluk iha Sentru Konvensaun Dili (CCD), segunda ne’e.
Nu’udar ema rezisténsia ida, nia triste tebes ho hahalok joven timooan sira-ne’ebe balun nafatin envolve iha krime.
“Buat boot ita hetan tiha ona, tan de’it buat kiik oan ne’e mak lakon vida. Ida-ne’e, ami nu’udar rezisténsia triste loos tanba ne’e iha 12 novembru ne’e presiza valoriza no dignifika lutadór sira no tenke kontribui ba pás no estabilidade ba rai ida-ne’e,” nia hateten.
Membru Komité 12 Novembru, Elsa Camila Viegas, hateten joven mak ai-riin ba nasaun Timor-Leste, tanba ne’e presiza kontribuisaun no dezenvolvimentu tanba dezenvolvimentu mak juventude sira.
“Ha’u ne’ebé uluk 1991 ne’ebé kontribui ba rai ida-ne’e, ho unidade tebes entre joven tanba iha momentu ne’ebá joven hotu unidu no dame hodi luta kontra invazaun sira. Nune’e, hanesan joven kontinuadór apela ba joven atu kria pás no estabilidade ba dezenvolvimentu ba ita-nia rain. Tanba joven mak ai-riin ba nasaun nian,” nia dehan.
Membru C12N, Alexsandrino Da Costa Samurai, hateten katak tenke valorize lutadór sira tanba iha masakre 12 novembru 1991 mak joven mate barak.
“Hanesan lorico Asswa’in iha tinan hirak ba kotuk ne’ebé buka liberta ita-nia rain no hakarak ukun rasik-aan. Tanba 12 Novembru ne’e iha nia signifikante tebes, tanba ema barak mate ba rai ida-ne’e. Entaun loron 12 Novembru ne’e importante tebes ba ita joven hotu, entaun aktu saida de’it mak laiha benefísiu no indikasaun ba krime lalika envolve no tenke kontribui ba estabilidade ba rai ida-ne’e.” nia hateten.
Ho ne’e, nia husu ba joven sira-ne’ebé moris iha tinan 2000 tenke kontribui matenek no estabilidade, tanba imi joven mak sai jerasaun tuir mai ba rai ida-ne’e.
Joven sira tenke banati tuir ema rezistensia sira halo ona iha funu naruk ne’ebá, tanba joven ne’ebé moris iha tinan 2000 ne’e hein goza deit, no la sente terus no kolen, iha udan no loron manas laran.
“Entaun, presiza ita-boot sira-nia kontribuisaun ba estabilidade mak estuda, buka servisu, buka aprende no matenek ne’ebé kualidade iha future, tanba interrese nasionál ba rai ida-ne’e,” nia dehan.
Jornalista : Osória Marques
Editór : Cancio Ximenes
