VIQUEQUE, 07 novembru 2023 (TATOLI)—Estadu Timor-Leste sei atribui kondekorasaun medalla orden Nicolau Lobato ba Kombatente munisípiu Viqueque na’in-185 nu’udar rekoñesimentu ba kontribuisaun luta libertasaun nasionál.
“Sira sei simu kondekorasaun iha komemorasaun lorin proklamasaun independénsia ba dala-48 iha loron 28 novembru agora,” Prezidente Konsellu Veteranu munisípiu Viqueque, Lentil da Câmara, informa iha ninia knaar fatin, antiga komarka Viqueque Vila, tersa ne’e.
Estadu sei atribui medalla orden Nicolau Lobato ba kombatente ho grau 3 no 4 A7.
“Antes ne’e, Governu haruka lista ba ami hamutuk 1.000 resin, maibé ita mós haree fila ba orsamentu, tanba ne’e maka redús filafali númeru. Sei atribui hotu ba kombatente sira-ne’e, maibé ita sei haree fazedamente,” nia hato’o.
Notísia relevante : Estadu Kondekora Padre João de Deus ho Grau Medalla Órden TL
Atribuisaun sei realiza iha munisípiu Viqueque, hafoin ramata serimónia isar bandeira ba komemorasaun loron proklamasaun independénsia.
Konsellu Veteranu Viqueque halo ona koordenasaun ho parte nasionál hodi serimónia bele la’o ho di’ak.
Tuir dadus, Kombatete ne’ebé simu kondekorasaun medalla orden Nicolau Lobato, iha postu administrativu Uatucarbau 40, Uatulari 40, Ossu 40, Viqueque Vila 40 no Lacluta 25.
Jornalista : Vitorino Lopes da Costa
Editora : Julia Chatarina
