KRO aprova orsamentu inklui adisionál ba SEI millaun $2.1
DILI, 07 novembru 2023 (TATOLI)—Komité Revizaun Orsamentu (KRO) aprova ona orsamentu ba Sekretária Estadu ba Igualdade (SEI) inklui adisionál ho montante hamutuk millaun $2.1 ($2.147,053).
“Haree ba nesesidade SEI nian ne’ebé barak ba iha implementasaun iha tinan 2024 nian, nune’e SEI propoin atu halo proposta ba orsamentu adisionál ho totál hamutuk $756.950 ne’ebé inklui orsamentu adisionál ba iha harii edifísiu foun SEI nian hamutuk $200.000. Nune’e KROP konkorda atu orsamentu adisionál ba iha harii edifísiu foun SEI koloka iha Fundu Infraestrutura nian entertantu Orsamentu adisionál ho montante $556.950, KROP aprova orsamentu ba SEI iha OJE 2024 ne’e hamutuk $2.147,053,” refere komunikadu ne’ebé Agência Tatoli asesu, tersa ne’e.
Totál orsamentu tuir tetu orsamentu ne’ebé aloka husi Ministériu Finansa mai SEI hamutuk $1.590,103, ne’ebé fahe ba iha kategoria tolu (3) mak hanesan saláriu no vensimentu $915.129, bens no servisus $ 574.974, no transferénsia públiku $100.000.
Orsamentu ne’e sei sustenta ba implementasaun atividade SEI nian iha tinan 2024, ne’ebé sei foku ba iha programa prioridade Abordajen Integrada Jéneru, Prevensaun Violénsia Bazeia ba Jéneru, Hakbiit Ekonómia Feto no Promove partisipasaun feto iha vida polítika no nivel foti desizaun.
Orsamentu ne’ebé alokadu sei sustenta ba iha implementasaun atividade hotu SEI nian iha tinan 2024 ne’ebé sei foku ba iha programa prioridade sira hanesan Abordajen Integrada Jéneru, Prevensaun Violénsia Bazeia ba Jéneru, Hakbiit Ekonómia Feto no Promove partisipasaun feto iha vida polítika no nivel foti desizaun.
Planu Asaun Anuál SEI nian ba iha OJE 2024 ne’e aprezenta direta hosi Sekretária Estadu Igualdade, Elvina Sousa Carvalho, ne’ebé akompañadu hosi Diretór Jerál SEI, Armando da Costa, Xefe Gabinete SEI, Francisca de Sousa, Diretora Nasionál Jestaun Planu Estratéjia, Celeste Ramos Martins Gonçalves, Diretora Nasionál Administrasaun no Finansa SEI Maria Eusébia de Lima, Diretora Nasionál Polítika Jéneru no Inkluzaun, Maria Filomena Babo Martins no ekipa téknika inklui asesór no asesora ne’ebé fó apoiu téknika ba iha prepara PAA SEI tinan 2024 nian.
KROP prezide direta hosi Primeiru Ministru, Kay Rala Xanana Gusmão ho membru KROP sira hanesan Ministra Finansa, Santina José Rodrigues Viegas Cardoso, Ministru Planeamentu no Investimentu Estratéjiku, Gastão Francisco de Sousa, Ministru Obras Públika (MOP), Samuel Marçal no Vise-Ministra Finansa, Felicia Claudinanda.
Jornalista : Osória Marques
Editór : Cancio Ximenes
