KRO aprova orsamentu MSSI millaun $20.7
DILI, 07 novembru 2023 (TATOLI)—Komité Revizaun Orsamentu (KRO), tersa ne’e, aprova orsamentu ba Ministériu Solidariedade Sosiál no Inkluzaun (MSSI) ho montante millaun $20.7 ($20.732,817).
“Totál orsamentu ida-ne’e sei aloka ba kategória lima (5) hanesan saláriu no vensimentu, bens servisu, kapitál menór, kapitál dezenvolvimentu inklui trransferénsia públika.” Ministra Solidariedade Sosiál no Inkluzaun (MSSI), Verónica das Dores, hateten ba jornalista sira iha Ministériu Finansa, Aitarak-Laran.
Hosi orsamentu ida-ne’e, nia hatutan, sei aloka tuir programa prioridade MSSI nian ba tinan 2024 mak protesaun ba labarik, protesaun ba feto, asuntu defisiénsia, seguransa sosiál inklui rekursu umanu, no iha aprovasaun ne’e aprova mós orsamentu ba Sentru Nasionál Reabilitasaun (CNR, sigla portugés) no Institutu Nasionál Seguransa Sosiál (INSS).
Iha aprezentasaun ne’e, Primeiru-Ministru, Kay Rala Xanana Gusmão husu ba MSSI atu jere osan povu nian ho di’ak no husu mós atu hadi’a polítika programa bolsa da mãe jerasaun foun hodi fó prioridade ba eroi vivu tanba sira-ne’e mak terus hodi Timor-Leste bele hetan ninia ukun rasik-aan.
Jornalista : Osória Marques
Editór : Cancio Ximenes
