BAUCAU, 08 novembru 2023 (TATOLI) – Angelino Moisés Perreira kontinua re-eleitu ba Xefe suku eleitu, postu administrativu Venilale, munisipiu Baucau no kompromete sei akumula ideia komunidade hodi hamutuk dezenvolve suku durante tinan-hitu mai.
Xefe suku, Angelino Moisés Perreira, esplika, hafoin rezultadu eleisaun komunitária iha suku refere fó sai, nia parte kompromete sei planu atu hadi’a iha setór importante sira hanesan ambiente, justisa, problema sosiál.
“Planu prioridade ba príodu durante tinan-hitu mai mak presiza tara bandu atu asegura setór oinoin iha Fatulia,” Xefe suku eleitu Fatulia informa ba TATOLI iha Vila Nova, kuarta ne’e.
Angelino Perreira argumenta, depois reuniaun konsellu suku sei renova hikas tara bandu iha suku refere nune’e bele konserva ambiente hanesan bandu tesi ai arbiru, rezolve kazu disputa rai entre komunidade no buka solusaun ba problema sosiál iha suku Fatulia.
LÍder komunitária ne’e sei kolabora ho joven intelektuál, kandidatura xefe suku seluk inklui komunidade jerál atu hamutuk fó hanoin ba malu hodi dezenvolve suku iha futuru.
“Ha’u nafatin simu komunidade nia ideia atu sai ponte iha suku Fatulia hodi hadi’a di’ak liután iha futuru,” Angelino Perreira akresenta.
Suku Fatulia iha eleisaun komunitária volta dahuluk hamutuk kandidatura na’in-lima hanesan Moisés Perreira eleitu nu’udar xefe suku ho votu hamutuk 794 ka pursentu 63.
Tuir kedas João Sarmento pursentu 17, Maria da Cruz pursentu 11, Joana Ribeiro pursentu 5 no Afonso Ribeiro pursentu 5.
Suku Fatulia hamutuk eleitór hamutuk 1.259 hosi totál populasaun 2.721 komposta hosi aldeia haat hanesan Bahadato, Osso-uaque, Uai-to-Bono no Uatulia-ana.
Jornalista : Natalino Belo
Editór : Evaristo Soares Martins
