FAO implementa programa tolu responde problema hamlaha iha TL
DILI, 10 novembru (TATOLI)—Oganizasaun Nasaun Unida ba Aihan no Agrikultura (FAO) implementa programa tolu ne’ebé importante ba aumenta produtu lokál atu responde probelma kona-ba hamlaha iha Timor-Leste (TL).
“Programa tolu importante atu ajuda aumenta produtu lokál hanesan tulun joven sira iha área rurál asesu ba serbisu, apoiu atu hadi’ak nutrisaun ai-han no ikus mai promove jestaun sustentavél hosi rekursu naturál,” Reprezentante FAO iha Timor-Leste, Paula Lopes, hateten ba Agência Tatoli iha City8 Manleuana, sesta ne’e.
FAO fornese apoiu tékniku no enkuadramentu nasionál iha liña ho polítika Estadu nian hodi fó serbisu ba setór agríkola iha Timor-Leste.
Daudaun ne’e, FAO hala’o serbisu iha suku 30 no sei habelar ba suku 46 no nia serbisu abranje iha munisípiu 10, la inklui RAEOA, Liquiça no Dili
Kada munisípiu FAO rekruta extensionista na’in-30 hodi hala’o serbisu iha munisípiu 10 no kada munisípiu iha ema na’in-tolu, no FAO mós fornese dezenvolvimentu abilidade atu implementa sistema konservasaun agríkultura.
“Ami fó konsellu ba agrikultór sira iha rejiaun rurál hodi moderniza hosi sistema ka métodu tradisionál. Ami mós bandu komunidade rurál sira atu evita komportamentu la di’ak ida atu sunu rai arbiru ne’ebé bele afeta mudansa klimátika,” nia hateten.
Rezultadu ba programa tolu hatudu katak agrikultór rurál bele prodús dala rua hosi sistema ne’ebé iha no aumenta kuantidade produsaun hanesan haree tonelada neen kada ektare no hasa’e mós kultivasaun batar iha Viqueque no Natarbora.
Aleinde ne’e, FAO mós forma ekipa atu fó dadus globál kona-ba metodolojia alerta sedu ba tempu bailoron naruk no dezastre naturál ho tempu udan ba agrikultór sira.
Enkuantu Tuir Global Hunger Index (GHI), iha tinan 2023 ne’e revela kategóriu seriu alerta TL hamlaha aas liu iha rejiaun sudeste aziátiku ho pontuasaun 29,9, tanba tama ba rangking 112 hosi nasaun 125, ba problema, subnutrisaun; Fraku; Stunting (ra’es-badak); Mortalidade ba labarik no ho númeru ne’e, Timor-Leste kategória “seriu”.
GHI hatuur Timor-Leste nu’udar nasaun hasoru hamlaha ba da-14 iha mundu hafoin Mosambike, Afganistaun, Haiti, Siera Leone, Liberia, Guiné-Bissau, Chad, Nigeria, Lesotho, Congo, Yemen, Madagaskar no Repúblika Áfrika Sentrál.
Rangking ne’e mós hatuur Timor-Leste iha rejiaun sudeste aziátikun númeru ida ikus liu ba Laos, Indonézia, Kambodia, Myanmar, Filipina, Malázia, Tailádia, Vietnam, Brunei Darrusalam no Singapura.
Jornalista : Nelson de Sousa
Editór : Cancio Ximenes
