Autoridade RAEOA hatuur fatuk dahuluk harii eskola tolu iha Pante Makasar

OÉ-CUSSE, 14 novembru 2023 (TATOLI) –  Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretária Rejionál ba Asuntu Edukasaun Solidariedade Sosiál, tersa ne’e hatuur fatuk dahuluk harii eskola unidade tolu iha suku Bobokase no Costa, sub-rejiaun Pante Makasar.

Sekretária Rejionál ba Asuntu Edukasaun Solidariedade Sosiál, Avelina da Costa, informa, eskola unidade rua konstrui iha suku Bobokase, hanesan Eskola Bázika Sentrál (EBC, sigla portugés) Boboloa no Eskola Pré-Eskolár (EPE) Paineno.

Notísia relevante: RAEOA aloka millaun $2-resin harii eskola foun 19 no hadi’a edifísiu rua

Nune’e mós harii Pré-Eskolár (EPE) unidade ida iha Quinat suku Costa pertense sub-rejiaun Pante Makasar, atu fasilita estudante sira bele asesu fasilidade edukasaun ho dignu.

“Ohin ita hahú lansa primeira pedra ba eskola tolu, EBC Boboloa iha tinan barak alunu sira aumenta, tanba eskola ne’e ejiste iha komunidade nia leet, entaun ita agradese tanba inan-aman lori sira-nia oan atu mai Eskola,” Avelina da Costa, ko’alia iha ámbitu seremónia hatuur fatuk dahuluk ne’e.

Tan ne’e, kada tinan estudante aumenta, Autoridade presiza aumenta edifísiu ba eskola sira, nune’e bele atende oan-sira, inklui kontrusaun foun ba pré-eskolár Paineno no Quinat.

“Tanba saida mak ita harii mós pré-eskolár hanesan aliserse, presiza ita harii fundasaun ne’ebé maka presiza hahú forma ita-nia oan sira, hahú hosi idade kiik, atu aprende, nune’e sira-nia edukasaun tuir mai labele prezudika sira iha futuru,”nia fó hanoin.

Diretór Rejionál Infraestrutura, Candido dos Reis Amaral, espera kompañia sira aselera konstrusaun garante kualidade no kumpri termu kontratu, iha prosesu implementasaun.

“Ein-jerálmente hosi ita-nia objetivu ba kontratu ne’e, maka oferese servisu ne’e ho kualidade, tanba kampañia sira liuhosi avaliasaun, ne’e tama iha kategória mellór, tenke hatudu iha finál servisu tenke oferese ho kualidade, autoridade hein hela ita-boot sira-nia komitmentu atu kumpri termu kontratu, nune’e konfiansa sira-ne’e sei hela ho autoridade ba futuru,” nia espera.

Notísia relevante:Investimentu ensinu pré-eskolár hosi nível aldeia sai prioridade ba Autoridade RAEOA

Xefe suku Bobokase, Sebastião Cob, agradese ba Governu Timor-Leste, liuhosi Autoridade RAEOA, tanba bele tau atensaun ba fasilidade edukasaun iha suku Bobokase.

“Ami reprezenta komunidade agradese boot ba Governu liuhosi Autoridade RAEOA, ne’ebé fó atensaun kona-bá asuntu edukasaun nian, tanba ami-nia edifísiu sira-ne’e kada tinan aat ba beibeik, maibé iha tempu ne’e Autoridade Oé-Cusse bele fó atensaun ba ami-nia suku,” autoridade lokál ne’e orgullu.

Entretantu, projetu eskola EBC Boboloa ezekuta hosi kompañia Bocbobo Unipesoál Lda ho valór kontratu $106,436.57, Eskola Pré-Eskola Paineno ezekuta hosi kompañia Dijujo Unipesoál Lda ho valór kontratu $90,008.21, no Eskola Pré-Eskolár Quintat ezekuta hosi kompañia Tafen Kuan Unipesoál Lda ho valór kontratu $95,120.53.

Orsamentu hirak-ne’e, Autoridade RAEOA aloka hosi Orsamentu Jerál Estadu (OJE) 2023 nian, ho durasaun servisu durante fulan haat, hahú novembru 2023 sei konklui iha fevereiru 2024.

Notísia relevante: PA RAEOA fó hanoin kompañia sira aselera projetu atu kontribui ba ezekusaun OJE 2023

Jornalista: Abílio Elo Nini

Editór: Evaristo Soares Martins