SASCAS halo doasaun raan apoiu ba pasiente sira ne’ebé presiza
DILI, 14 novembru 2023 (TATOLI) – Servisu Apoiu Sosiedade Sivíl Auditoria Sosiál (SASCAS) hala’o doasaun raan iha Banku Sangue Hospitál Nasionál Guido Valadares (HNGV) atu ajuda ba pasiente sira ne’ebé presiza raan.
“Ohin ami halo atividade doasaun raan iha Banku de Sangue Hospitál Nasionál Guido Valadares (HNGV), tanba ami halo parseiru ho Kruz Vermelha Timor-Leste (CVTL) iha programa ida atu apoiu raan ba ema hotu ne’ebé presiza”, Diretór Ezekutivu SASCAS, Elvin Duarte Soares Noronha, dehan ba jornalista sira hafoin konklui doasaun raan iha edifísiu CVTL, Bairo Formoza, ohin.
Nia dehan, CVTL ho SASCAS fornese ona 400 kantun plástiku dezde janeru kona-ba doasaun raan ba pasiente ne’ebé mak presiza iha fasilidade saúde sira.
“Husi ita-nia doasaun ne’e atu apoiu ba fasilidade saúde sira ne’ebé mak estoke raan menus, tanba pasiente barak mak kada loron presiza raan, entaun ida-ne’e mak ami haree katak CVTL mós iha fatin entaun ami halo atividade iha ne’e”, nia dehan.
Nia esplika, funsionáriu SASCAS ne’ebé halo doasaun raan ba Banku de Sangue HNGV hamutuk 38.
Iha fatin hanesan, Xefe Departamentu Banku de Sangue, HNGV, Cladio Julio Quintão, informa atividade ida-ne’e hala’o husi SASCAS no estudante universitáriu UNTL balun, ne’ebé hakarak apoiu raan ba Banku de Sangue hodi ajuda ba pasiente sira ne’ebé presiza.
“Husi tipu raan ne’ebé mak iha, Banku de Sangue hanesan A, AB no O menus hotu tanba ita responde hotu ba pasiente sira-nia presiza”, Cladio Julio Quintão, dehan.
Nia informa, husi atividade doasaun raan ne’e espera katak bele responde ba nesesidade pasiente nian tanba raan ne’e sei liuhosi teste oioin ba moras sira, husi ne’e mak buat hotu di’ak no bele garante katak responde ona ba pasiente sira ne’ebé mak presiza.
“Ita durante ne’e garantia ba família, entaun estoke menus liu, tanba ne’e husu ba ema hotu bele voluntáriu atu apoiu raan hodi bele ajuda ba ema ne’ebé presiza raan”, nia konklui.
Jornalista : Felicidade Ximenes
Editór : Zezito Silva
