SEI apoia fundu rihun $68 ba grupu 38 empodera feto rurál
DILI, 21 novembru 2023 (TATOLI)—Sekretária Estadu Igualdade (SEI), tersa ne’e, asina akordu ho Asosiasaun Feto Munisípiu 10 hodi fó apoiu fundu rihun $68 ba grupu 38 atu empodera feto rurál.
“Orsamentu ne’e aloka ba Asosiasaun Feto munisípiu 10, ba grupu sira-ne’ebé hamahan-aan iha asosiasaun feto 10 iha grupu hamutuk 38. Kada grupu sei hetan rihun $2, eseptu munisípiu Manatuto ho Bobonaro,” Diretór Jerál Sekretária Estadu Igualdade (SEI), Armando da Costa hateten ba jornalista sira hafoin asina akordu ho Asosiasaun Feto sira iha salaun Maria Gorrete, Matadoru.
Tinan ida-ne’e, munisípiu Manatuto ho Bobonaro mak laiha aplikasaun ba fundu transferénsia hosi SEI, tanba la prienxe kritéria maibé SEI nafatin apoia hodi hadi’a no bele hetan tinan oin mai.
“Tanba, objetivu hosi apoiu ne’e atu hadi’a feto rurál sira-nia moris. Nune’e liuhosi ida-ne’e bele tulun sira no karik iha problema bele sai hosi problema. Entaun, fundu ne’e sei halo ba negósiu sira hanesan haki’ak animál tantu ikan, fahi, manu, karau, loke kioske, kuda modo no atividade seluk iha ortikultura no agrikultura nian,” nia dehan.
Sekretária Estadu Igualdade (SEI), Elvina Sousa Carvalho, hateten asosiasaun empoderamentu feto no grupu ekonómiku sira-ne’ebé sei hetan fundu hosi SEI ne’e, husu grupu sira iha asosiasaun feto munisípiu atu utiliza osan ho didi’ak.
“Sekretária Estadu nia intensaun oferese fundu ne’e hodi empodera feto sira no finansia ekonómia família uma laran nian,” nia hateten.
Ba grupu feto sira-ne’ebé mak uza osan la tuir regra mak sei lahetan opurtunidade iha futuru, tanba SEI iha ekipa monitorizasaun ne’ebé forte hodi haree no avalia kuandu dezenvolvimentu ba utitlizasaun la la’o.
“Nafatin enkoraja ita-boot sira katak liuhosi fundu ne’e tenke dezenvolve ho di’ak ita-nia negósiu, Nune’e, fó fila ona no oferese fali ba grupu seluk ne’ebé seidauk iha oportunidade no presiza duni atu uza. Fundu ida-ne’e ho mekanizmu rotativu no mínimu tinan ida ba leten,” nia dehan.
Prezidente Asosiasaun Feto Kulu Fatuk Laran, munisípiu Baucau, Juvita Oliveria, hateten liuhosi fundu ne’e bele hadi’a di’ak liután ekonómia família nian.
“Agradese ba Sekretária Estadu Igualdade tanba bele ona fasilita no apoiu fundu ba ami-nia grupu lima iha Asosiasaun munisípiu Baucau. Liuhosi fundu ne’e bele hadi’a di’ak liután ekonómia família nian. Kada grupu la hanesan, tanba balun loke kioske, iha seluk fali haki’ak animál (kualker) no iha grupu ida mak haki’ak karau,” nia hateten.
Asosiasaun Feto munisípiu Baucau iha Grupu lima hosi postu administrativu Vemasse, grupu ida iha Baucau Vila nian.
Jornalista : Osória Marques
Editór : Cancio Ximenes
