Governu legaliza ona Asosiasaun Rede Soru Na’in iha Timor-Leste
DILI, 22 novembru 2023 (TATOLI)–Governu liuhosi Ministériu Justisa, kuarta ne’e, legaliza ona Asosiasaun Rede Soru Na’in atu bele pormove no perzerva tais tanba tais mak Timor-Leste nia identidade.
Notísia Relevante: Soru-na’in rekomenda Governu kontrola xineza imita dezeñu tais Timor
Prezidente Asosiasaun Rede Soru Na’in Timor-Leste, Luciana Guterres, hateten to’o asosiasaun ne’e habelar ona ba munisípiu Viqueque, Baucau, Lautém, Bobonaro, Oé-Cusse no Covalima ne’ebé mak iha ona ema na’in-600 mak envolve-aan iha asosiasaun refere.
“Objetivu harii Rede Soru Na’in hanesan sai mahon ba soru na’in sira iha Timor-Leste liuliu iha munisípiu neen ne’ebé ita hakarak atu promove fali ita-nia tais ne’ebé mak dezde tempu bei’ala nian. Nune’e, presiza hamutuk ho ita-nia rede na’in sira hotu atu promove no prezerva tais ne’e, tanba tais mak ita-nia identidade Timor nian,” Luciana Guterres hateten ba jornalista sira iha Notariadu Ministériu Justisa (MJ), Mandarin.
Nia hateten, Asosiasaun Rede Soru Na’in ida-ne’e forte no firme hodi kontinua halo produsaun ba tais ne’e, tanba nasaun seluk hahú imita dezeñu tais hodi halakon tais nia orijinalidade.
Asosiasaun Rede Soru Na’in harii iha 2021 no tinan 2023 ne’e mak hetan legalidade, no hetan apoiu hosi UN Woman ne’ebé servisu hamutuk ho Timor Aid no Fundasaun Alola.
UN Women Economic Empowerment (WEE) Konsultór Internasionál, Joana Pinto Coelho, hateten UN Women, Timor Aid no Alola Foundation hahú elabora Tais nia Rede iha tinan 2018 iha munisípiu rua no agora habelar ona ba munisípiu neen (6).
“Iha oportunidade boot ida ba asosiasaun ida-ne’e mak ohin ofisialmente rejistu no legalizadu hosi Ministériu Justisa,” nia dehan.
Jornalista : Osória Marques
Editór : Cancio Ximenes
