“Kréditu suave ne’e iha empreza barak mak selu ho di’ak”
DILI, 22 Novembru 2023 (TATOLI)—Membru Komisaun Ezekutivu Banku Nasional Komersiu Timor-Leste (BNCTL, sigla portugés), Joaquim dos Reis Martins, hateten BNCTL prontu ona atu aopia maibé tanba Governu foun ne’e la’o hela entaun Ministériu Turizmu Komersiu no Indústria (MTKI) mós tenke troka prosedimentu sira-ne’e.
“Entaun tenke muda hahú hosi desizaun Governu nian, tenke muda estrutura hodi aseita ba ministru anteriór nian maibé tenke asesu ba kréditu suave, no iha empreza barak mak selu ho di’ak,” Joaquim dos Reis Martins dehan ba jornalista sira, kinta ne’e.
Tuir dadus hosi MTKI, kompañia hamutuk 47 mak benefisiáriu hosi programa kréditu suave hosi 2021 to’o Abril 2023.
Proposta sira-ne’ebé aprova ona kobre atividade ekonómika sira iha setór indústria iha 21, setór agríkola iha 14, setór turizmu iha sia (9) no setór komérsiu iha tolu (3).
Hosi rejiaun sira-ne’e, proposta sira mai hosi Aileu iha rua (2), Ainaro iha ida (1), Ataúro iha ida (1), Baucau iha tolu (3), Bobonaro iha rua (2), Covalima iha rua (2), Dili iha 26, Ermera iha ida (1), Lautém iha ida (1), Liquiça iha tolu (3), Viqueque iha ida (1), Manatuto no Manufahi ne’ebé seidauk iha ema ne’ebé elijivel atu asesu ba kréditu suave.
“Iha proposta barak ne’ebé aprezenta ona no fundu sira-ne’ebé fornese seidauk to’o tokon $1. Oras ne’e, ami hetan ona aprovasaun liuhosi membru Komisaun Ezekutivu Kréditu Suave maizumenus tokon $700,000,” nia dehan.
Nia espera, iha futuru Governu liuhosi MTKI, bele konsidera kontinua programa ne’e, tanba ne’e util ba empreza mikro, ki’ik no médiu sira maibé tenke fasilita prosesu rejistu atu fasilita di’ak liután.
Ministru Komérsiu no Indústria, Filipus Nino Pereira, anúnsia Governu foun ne’ebé lidera hosi Primeiru-Ministru, Kay Rala Xanana Gusmao, konkorda atu kontinua programa kréditu suave, maibé tenke atualiza rekezitu ba aplikante sira.
“Ami haree katak programa ne’e di’ak atu apoia ami-nia MSME sira. Ha’u organiza ona atu forma ekipa foun ida no halibur dadus, atu nune’e ami bele halo kedas revizaun se prosedimentu sira uluk nian presiza atualiza ka lae,” nia dehan.
Antes ne’e, Konsellu Ministru halo ona kustu sira tuir kontratu dé depozitu iha BNCTL ba implementasaun instalasaun garantia kréditu ne’ebé di’ak.
Desizaun ida-ne’e sei autoriza transferénsia tokon $50 hosi konta tezureira ba konta bankária ne’ebé loke tuir kontratu ida-ne’e.
Kréditu suave hetan finansiamentu ho valór tokon $50, ne’ebé rejistu ona iha Orsamentu Jerál Estadu (OJE) ba tinan 2022.
Liuhosi kréditu ida-ne’e, ema ne’ebé simu kréditu bele husu kréditu iha banku hosi $1.000 to’o $25.000 ho interese anuál 3%.
Jornalista : Osória Marques
Editór : Cancio Ximenes
