Projetu ICU iha ospitál Oé-Cusse atinje 95%
OÉ-CUSSE, 23 novembru 2023 (TATOLI) – Diretór Rejionál Infraestrutura (DRI), Rejiaun Administrativa Espesiál Oé-Cusse Ambeno (RAEOA), Candido dos Reis Amaral, informa, projetu sala Unidade Kuidadu Intensivu (ICU, sigla inglés) iha Hospital Referál Oé-Cusse, daudaun ne’e atinje ona 95%.
Notísia relevante: DRI ameasa hakotu kontratu kompañia Zero Quatro Lifau
“Agora iha ona 95%, hein de’it halo instalasaun interiór sira balu de’it, iha tempu badak bele entrega ba Autoridade,” Candido Amaral, ko’alia iha Oé-Cusse, kinta ne’e.
Nia argumenta, projetu ne’e la’o tarde, tanba antes ne’e kompañia enfrenta difikuldade iha prosesu ezekusaun, maibé hafoin hato’o xamada, kompañia promete atu finaliza obra ne’e.
“Ne’ebé agora nia servisu kuaze atu hotu ona hela servisu kmaan sira atu kompleta ba 100%, demora uitoan maka ekipamentu médiku, persiza halo verifikasaun, maibé ba konstrusaun ne’e rasik ita bele dehan iha dezembru 2023 ne’e kompañia bele finaliza ona,” nia katak.
Amaral hatutan, tuir loloos kompañia entrega projetu ICU ne’e iha 11 abríl 2023 ne’e, tanba durasaun kontratu durante fulan-haat de’it hahú iha dezembru 2022 to’o abríl 2023.
Entretantu, konstrusaun sala Unidade Kuidade Intensivu ne’e kompañia Zero Quatro Lifau Lda, ezekuta ho valór kontratu hamutuk $219,075.50, orsamentu ne’e Autoridade RAEOA aloka hosi Orsamentu Jerál Estadu (OJE) 2022 nian.
Durasaun ba projetu ne’e durante fulan haat, kompañia Zero Quatro Lifau Lda hahú hatuur fatuk dahuluk iha loron 10 dezembru 2022 tenki remata iha loron 11 dezembru 2023.
Notísia relevante:RAEOA aloka millaun $1-resin konstrui fasilidade saúde públika
Jornalista: Abílio Elo Nini
Editór: Evaristo Soares Martins
