PDHJ define ema vulnerável sira iha protesaun hasoru violasaun direitu umanu
DILI, 24 novembru 2023 (TATOLI)–Reprezentante Provedória Direitu Umanu no Justisa (PDHJ), Marina Bernadina, hateten planu estratéjiku PDHJ nian ba tinan 2021-2025 ne’e define ema vunerável sira iha protesaun hasoru violasaun direitu umanu.
“Planu estratejiku PDHJ nian 2021-2025 define metas ida kona-ba ema vunerável sira iha protesaun hasoru violasaun direitu umanu no bele hetan asesu ba atendementu públiku ida-ne’ebé di’ak,” Marina Bernardina hateten iha aprezentasaun matéria ne’e iha ámbitu semináriu nasionál ba promosaun no protesaun direitu ema ho defisiénsia, sura ho ha’u-nia asaun ba protesaun direitu ema ho defisiénsia iha sosiedade, iha Hotel Ramelau, Aimutin, sesta ne’e.
Tanba, nia dehan, servisu PDHJ nian liga ba direitu Ema ho Defisiénsia (EhD) sira mak simu no prosesu keixa relasiona ho violasaun direitu umanu hasoru EhD.
“PDHJ simu no rejista keixa hosi EhD hamutuk rua (2) iha tinan 2021-2022. Ami hala’o Investigasaun ba kazu ne’ebé EhD keixa ba iha PDHJ kona-ba asesu ba edukasaun iha UNTL. Seluk mak monitorizasaun no advokasia PDHJ hala’o monitorizasaun ba eleisaun Presidensial no Parlamentar hodi asegura EhD nia direitu vota,” nia dehan.
Estatutu PDHJ iha Lei Nú. 7/2004 alterasaun Primeiru ba Lei Nú. 8/2009 fó kompeténsia ba PDHJ atu garante katak ba EhD sira bele hetan benefísiu hosi kna’aar sira-ne’ebé Provedoria hala’o.
PDHJ mós ativamente halo advokasia ba Governu relasiona ho ratifikasaun Konvensaun Internasional kona-ba Direitu EhD iha Lei Orgánika PDHJ DL Nú. 25/2011, alterasaun I ba Nú. 31/2016) define kompeténsia ka papel PDHJ nian ba promosaun no protesaun Direitu Umanu inklui direitu EhD.
Jornalista : Osória Marques
Editór : Cancio Ximenes
