PR Horta: Eventu “Car Free Day” promove saúde públiku

DILI, 25 novembru 2023 (TATOLI)—Eventu nasionál no Internasionál Car Free Day ne’ebé mobiliza ema hamutuk 1.000 la’o ain hosi edifísiu Ministériu Negósiu Estranjeiru no Kooperasaun (MNEK) to’o iha Ponte Prezidente Rapúblika B.J. Habibie Bidau Lecidere ne’e, ho objetivu atu promove saúde públiku.

“Eventu Car free day ho objetivu atu promove saúde ema-nian. Karreta atus ba atus ohin iha Dili laran paradu la halai, ida-ne’e parte ida mós atu poupa gazolina. Ema atus ba atus la’o ain iha eventu ne’e, foin primeiru ita hala’o hanesan faze ida ba ha’u atu estuda. Ba oin, ita kria nafatin eventu ne’e kada fulan ka oinsá,” Prezidente Republika, José Ramos Horta, hateten iha ninia intervensaun bainhira ramata atividade Car free day iha ponte Prezidente Repúblika B. J Habibie, sábadu ne’e.

Eventu ne’e mós dalan ida atu kontribui ba menus poluisaun no ema hotu la’o ain proveita halo ezersísiu.

“Eventu ida-ne’e Prezidente Repúblika servisu hamutuk ho Governu, setór privadu sira, parseiru internasionál sira hanesan Embaixada Indonezia iha Timor-Leste. Ida-ne’e foin dala uluk, maibé ba oin atividade hanesan ne’e sei halo boot liután,” nia hateten.

Tanba ne’e, Xefe estadu hato’o agradesimentu ba setór privadu sira-ne’ebé fó apoiu másimu ba eventu ne’e no la’o ho susesu.

Eventu ne’e iha mós atividade marsa hosi ekipa kada instituisaun hanesan Ministeriu Juventude Desportu Arte no Kultura (MJDAK), Gabinete Prezidente Repúblika, Sekretáriu Estadu Komunikasaun Sosial (SEKOMS), Sekretáriu Estadu Kooperativa (SEKoop), Polisia Nasionál Timor-Leste (PNTL), FALINTIL-Forsa Defeza Timor-Leste (F-FDTL), atleta sira hosi Paralimpíku no seluk tan.

Partisipa iha atividade ne’e, Prezidente Repúbkika, Primeiru-Ministru ho membru Governu sira, funsionariu hosi instituisaun sira iha Dili laran no populasaun baibain sira.

Atividade ne’e la’o iha ambitu hakmatek tanba hetan seguransa másimu hosi Polísia Nasionál Timor-Leste (PNTL) munisípiu Dili.

Tuir observasaun Agência TATOLI nian iha terenu nota katak ativiade ne’e hala’o hahú tuku 06h00 dadeersan la’o ain hosi Ministériu Negosiu Estranjeiru no Kooperasaun (MNEK) nia oin to’o ponte Prezidente Habibie, laiha movimentasaun transporte públiku to’o tuku 10h00 mak dalan púbkiku dirasaun tasi ibun foin mak loke, nune’e transporte públiku foin halo fali movimentassun normál.

Jornalista : Hortencio Sanchez

Editór       : Cancio Ximenes