Joven hapara violénsia hodi dezenvolve Timor-Leste ba futuru
DILI, 28 novembru 2023 (TATOLI)—Diretór Ezekutivu Asosiasaun HAK, Feliciano da Costa, husu joven jerasaun foun sira atu hapara violénsia hodi dezenvolve Timor-Leste ba loron aban nian.
“Iha komemorasaun loron 28 novembru, ba joven sira, mai ba, sente rai ne’e ita-nian, mai hamutuk hodi fó liman ba malu no hapara violénsia hodi dezenvolve ita-nia rain di’ak liután iha futuru mai,” Diretór Ezekutivu HAK ne’e hateten ba Agência Tatoli liuhosi WhatsApp (WA), relasiona Timor-Leste komemora loron proklamasaun indenpendénsia ba dala-48 (28/11/23-28/11/23) ho tema “Celebrar a História e Construir o Futuro”, tersa ne’e.
Tuir nia, ukun aan ida-ne’e la’ós tau iha bandeiza maibé ne’e sakrifisiu ida-ne’ebé ema hotu dedika nia aan ba mate, tanba ne’e jerasaun foun tenke hamutuk hodi kontribui ba dezenvolvimentu nasionál.
“Ha’u hanoin dala ida tan Asosiasaun HAK nia naran hodi kongratula ba erói sira, ne’ebé dedika sira-nia aan ba ukun rasik-an ida-ne’e,” nia hateten.
Nune’e, nia husu ba Parlamentu Nasionál (PN) no governante sira atu tau prioridade ba povu Timor-Leste.
“Ami fiar katak la sura ema ida-rua de’it maibé kontribuisaun tomak hahú hosi aileba, ain-tanan ain-tahu sira-ne’ebé dedika sira-nia aan ba ukun aan ida-ne’e, nune’e favor ida, reprezentante povu iha uma fukun, kaer Governu tau atensaun prioridade ba sira-nia nesesidade bázika sira,” nia dehan.
Jornalista : Osória Marques
Editór : Cancio Ximenes
