iklan

DILI

ADTL husu mellora implementasaun inkluzaun ba dezenvolvimentu iha Timor-Leste

ADTL husu mellora implementasaun inkluzaun ba dezenvolvimentu iha Timor-Leste

Diretór-Ezekutivu Asosiasaun Defisiente Timor-Leste (ADTL), Cesário da Silva. Imajen Tatoli/Francisco Sony

DILI, 01 dezembru 2023 (TATOLI)—Diretór Ezekutivu Asosiasaun Defisiénsia Timor-Leste (ADTL), Cesário da Silva, husu Governu labele ho polítika de’it maibé presiza mellora implementasaun inkluzaun ba dezenvolvimentu iha Timor-Leste (TL).

Atu asegura dezenvolvimentu Timor-Leste ne’ebé inkluzivu, entaun ba komemorasaun loron mundiál ema ho defisiénsia ba tinan ida-ne’e ho tema mundial “Uniku iha asaun hodi salva no alkansa meta objetivu dezenvolvimentu sustentável ba ho no hosi ema ho defisiénsia”.

“Entaun atinje objetivu sustentável mak Ministériu hotu-hotu tenke servisu ho rigorozu tebes. Labele ho polítika de’it maibé presiza mellora implementasaun inkluzaun iha TL,” Diretór hateten iha nia intervensaun, iha ambitu selebrasaun loron Mundial ba ema ho defisiénsia iha Timor-Leste ho tema nasionál “Timor-Leste inkluzivu prósperu rezilente sustentável no asessível”, Sentru Konvensaun Dili (CCD-sigla Portugés), Dili, sesta ne’e.

Diretór Ezekutivu ne’e akresenta, Timor-Leste ne’ebé di’ak ba asuntu inklui defisiénsia maibé triste uitoan tanba hela de’it ho polítika asaun implementasaun ne’e presiza duni atu mellora.

“Atu atinje inkluzivu defisiénsia mak presiza asaun unidu hosi ita hotu, nune’e atu garante katak ema ho defisiénsia bele asesu ho di’ak ba prosesu dezenvolvimentu nasionál. Tanba dadus 2022 hatudu katak ema ho defisiénsia iha Timor-Leste hamutuk 93.000. Hosi númeru ne’e, bareira ne’ebé boot liu mak asesibilidade fíziku ne’e. Ezemplu kiik mak daudaun ne’e ema ho defisiénsia defísil asesu ba toilet públiku. Bareira seluk mak kompromisu polítika alokasaun rekursu ba implementasaun Timor-Leste nian no konvensaun direitu ba ema ho defisiénsia,” nia dehan.

Ida-ne’e merese no improtante atu hato’o ba Primeiru-Ministru Kay Rala Xanana Gusmão ho ministériu relevante atu asegura asesibilidade infraestrutura bázika, nune’e maluk defisiénsia mós bele asesu ho di’ak.

Ministru Solidariedade Sosiál no Inkluzaun (MSSI), Verónica das Dores, hateten liga ho asuntu defisiénsia ministériu relevante tenke servisu makaas hodi bele atinje meta objetivu Dezenvolvimentu Sustentável (ODS) iha Timor-Leste.

“Governu sei hasa’e bem estar ba ema ho defisiénsia sira,” nia hateten.

Serimónia selebrasaun loron mundial ba ema ho defisiénsia durante loron tolu hahú sesta (01 dezembru 2023) to’o domingu (03 dezembru 2023) ne’e, hetan partisipa hosi ema ho defisiénsia hosi munisípiu 13 inklui Rejiaun Administrativa Espesiál Oé-Cusse Ambeno (RAEOA), ne’ebé hetan apoiu no orientasaun hosi Primeiru-Ministru Kay Rala Xanana Gusmão no servisu hamutuk ho Governu liuhosi MSSI, ho Asosiasaun Defisiénsia sira iha Timor-Leste.

Iha eventu ne’e sei vizita Muzéu Rezisténsia Timor-Leste, Centro Nacional Chega (CNC), atividade feira ho produtu lokál, dansa kulturál durante loron tolu.

Eventu ne’e realiza hetan apoiu hosi MSSI, MTCI, Governu, USAID, Plan Internasionál, Timor Telekom, PHD liuhosi Austrália, Oxfam, Uniaun Europeia.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!