iklan

DILI

Ministra Verónica husu PR kondekora pioneiru ba dezenvolvimentu inkluzivu

Ministra Verónica husu PR kondekora pioneiru ba dezenvolvimentu inkluzivu

Ministra Solidariedade Sosiál no Inkluzaun (MSSI), Verónica das Dores. Inajen/Tatoli.

DILI, 01 dezembru 2023 (TATOLI)–Ministra Solidariedade Sosiál no Inkluzaun (MSSI), Verónica das Dores, husu Prezidente Repúblika (PR) atu fó kondekorasaun ba pioneiru no kontribuidór ba dezenvolvimentu inkluzivu hosi setór defisiénsia sira.

“Ha’u hakarak sujere ba Prezidente Repúblika no Primeiru Ministru, tinan oin, se bele iha selebrasaun 20 maiu ka 28 novembru, presiza mós rekoñese no kondekora pioneiru no kontribuidór sira ba dezenvolvimentu inkluzivu no sustentável hosi setór defisiensia liuliu hosi organizasaun ema ho defisiénsia sira.Tanba, autór ba dezenvolvimentu nasaun ne’e mai hosi mós ema ho defisiensia no timoroan barak mak sai mós hanesan pioneiru ba serbisu inkluzivu ba ema ho defisiénsia iha Timor-Leste,” Ministar ne’e hateten iha selebrasaun loron mundial ba ema ho defisiénsia iha Timor-Leste ho tema nasionál “Timor-Leste inkluzivu prósperu, rezilente sustentável no asesível” iha Sentru Konvensaun Dili (CCD, sigla Portugés), sesta ne’e.

Ezemplu, nia dehan, susesu ida mak Planu Asaun Nasionál ba Ema ho Defisiénsia 2021-2030 tanba planu ida-ne’e sai hanesan ezemplu konkretu kona-ba partisipasaun ema ho defisiénsia iha servisu parseria ho Governu hodi asegura planu, no implementasaun ba planu sira-ne’e reflete duni ba prioridade no nesesidade ba ema ho defisiénsia sira.

Aleinde ne’e, Retifikasaun Konvensaun Internasionál ba Direitu Ema ho Defisiensia ne’ebé sai hanesan vitória boot ida ba Timor-Leste.

“Ha’u hatene no akompaña, konvensaun ne’e finalmente Estadu ratifika depois luta ne’ebé naruk iha tinan barak. Ha’u rekoñese no orgullu ba setór defisiénsia iha Timor-Leste, imi halo servisu ho di’ak tebes. Rezultadu barak iha ona, maske buat barak sei presiza kontinua luta. Nune’e, ohin loron, ha’u husu ita hotu, atu hateke fali ba kotuk hodi rekoñese mós ema hirak ne’ebé sai hanesan pioneiru ba dezenvolvimentu setór defisiénsia iha Timor–Leste. Tanba ne’e sakrifísiu, kontribuisaun no susesu ne’ebé sira kontribui, ita iha dever atu rekoñese no temi nafatin nu’udar istória,” nia dehan.

Ho esforsu no kontribuisaun ne’ebé mak iha husu atu hamutuk hodi alkansa mehi boot ba futuru mak sosiedade Timor-Leste ida-ne’ebé inkluzivu, prósperu, reziliente, sustentável no asesível.

“Ha’u husu ba maluk ema ho defisiensia sira atu aproveita didi’ak oportunidade ida-ne’e. Há’u enkoraja maluk timoroan hotu atu dignifika no envolve ita-nia maluk ema ho defisiénsia sira iha ita-nia moris loro-loron.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!