DILI, 04 novembru 2023 (TATOLI)—Sekretária Estadu Kooperativa (SECoop) prevee orsamentu $5.162.599 iha proposta-lei Orsamentu Jerál Estadu (OJE) 2024, hodi fó prioridade ba programa rua.
“Proposta OJE 2024 ba SECoopp prevee $5.162.599 hodi aloka saláriu vensimentu $1.883.897, bens no serbisu $1.894.937, transferénsia públika $1.109.065, kapitál menór $274.700, kapitál dezenvolvimentu laiha, no iha tinan oin ne’e SECoop tau programa prioridade rua,” refere dokumentu livru proposta OJE 2024 ne’ebé Agência Tatoli asesu, segunda ne’e.
Tuir dokumentu livru proposta OJE 2024 planu asaun anuál, SECoop nian dahuluk mak programa dezenvolvimentu rurál no urbanu ho sub-programa promove no estabelese kooperativa ho ninia atividade neen (6) mak hanesan;
Dezenvolve kapasidade rekursu umanu kooperativa sira, konsolidasaun no estabelesimentu kooperativa, apoiu kooperativa produsaun integrada, dezeña no konstrui no supervizaun ba konstrusaun no instalasaun sentru kooperativa komunal, promove dezenvolvimentu estratéjiku kooperativa.
Sub-programa promove no dezenvolvimentu produtu kooperativa ho atividade rua hanesan jestaun atividade kooperativa territoriál ho promove no dezenvolve produtu kooperativa.
Daruak mak programa funsionamentu no dezenvolvimentu instituisionál ho ninia sub-programa rua no atividade hitu.
Enkuantu, iha segunda (04 dezembru 2023), Sekretáriu Estadu Kooperativa (SECoop, sigla portugés), Arsenio Perreira, hala’o audiénsia públika hodi aprezenta proposta OJE 2024 hosi SECoop nian ba iha komisaun D trata asuntu Ekonomia no Dezenvolvimentu iha Parlamentu Nasionál.
Jornalista : Nelson de Sousa
Editór : Cancio Ximenes
