SEI aprezenta rezultadu analiza orsamentu sensível jéneru ba GMPTL
DILI, 04 dezembru 2023 (TATOLI)—Sekretária Estadu Igualdade (SEI) hamutuk ho parseiru dezenvolvimentu nasionál no internasionál aprezenta rezultadu analiza Orsamentu Sensível Jéneru (OSJ) ba Orsamentu Jerál Estadu liña ministériu no instituisaun públika ba Prezidente Grupo Mulheres Parlamentár Timor-Leste (GMPTL) iha salaun enkontru GMPTL Parlamentu Nasionál.
Diretór Jerál Sekretária Estadu Igualdade (SEI), Armando da Costa, aprezenta rezultadu analiza orsamentu sensivel ba jéneru ne’ebé SEI halo ba iha alokasaun Orsamentu Jerál Estadu hosi instituisaun hotu ne’ebé hatudu katak iha Orsamentu Jerál Estadu tinan 2024 nian, iha Instituisaun hamutuk 54 ka 51% hosi totál 106 Instituisaun Estadu mak aloka ona orsamentu ba iha Igualdade Jéneru no Inkluzaun Sosiál ka Programa hamutuk 980.
Inkluzaun Sosiál ho montante Orsamentu hamutuk $113,113,622 hosi totál Orsamentu Jerál Estadu 2024 hamutuk biliaun $1,890.
“Orsamentu ne’ebé aloka ba iha igualdade no inkluzaun fahe ba iha kompromisu sira mak hanesan Planu Asaun Nasionál Violénsia Bazeia ba Jéneru (PAN-VBJ) hamutuk $639,636.57 (0,03%); Deklarasaun Maubisse Faze Datoluk hamutuk $15,017,350.00 (0,8%); CEDAW-AIJ hamutuk $2,961,213.00 (0,16%); PAN Ema ho Defisiénsia hamutuk $1,832,393.00 (0,10%); PAN Labarik hamutuk $430,956.00 (0,02%); PAN 1325 Feto, Pás no Seguransa hamutuk $109,645,542.00 (6%),” refere nota ne’ebé Agência Tatoli asesu, segunda ne’e.
Parseiru Dezenvolvimentu sira hanesan Programa Austrália nian hato’o kona-ba programa hirak-ne’ebé DFAT apoiu ba iha Governu Timor-Leste liuliu liga ba programa Bolsa da Mãe Jerasaun Foun ne’ebé MSSI la tau ona iha OJE tinan 2024, maibé DFAT sei tau orsamentu ruma iha programa refere ba tinan 2024.
Aprezentasaun hosi UN Women, JSMP, Rede Feto Timor-Leste, ALFeLa, Fokupers, Plan International hodi hato’o kona-ba programa ne’ebé durante ne’e sira apoiu no rekomenda ba GMPTL atu halo advokasia no hato’o rekomendasaun ne’ebé parte hotu hato’o liuhusi enkontru ho parte Governu iha Komisaun nian.
Prezidente GMPTL, Deputada Aliança de Araújo hato’o apresiasaun ba iha SEI no parseiru dezenvolvimentu nasionál no internasionál no sei konsidera hanoin hirak-ne’e iha enkontru komisaun ho parte Governu nian.
Nia husu atu submete dokumentu hirak-ne’ebé prepara ona ba iha Sekretária Grupo Mulheres Parlamentár Timor-Leste (GMPTL) nian hodi sai preferénsia ba GMPTL atu diskute iha nivel komisaun nian.
Jornalista : Osória Marques
Editór : Cancio Ximenes
