EDTL sei instala enérjia elétrika iha Saburai kobre uma-kain 79
BOBONARO, 05 novembru 2023 (TATOLI) – Eletrisidade Timor-Leste, Empreza Públika (EDTL,EP) munisípiu Bobonaro iha tempu badak sei implementa Projetu Eletrifikasaun Komunitária (PEK) hodi instala enérjia elétrika iha aldeia Kosal, suku Saburai, postu administrativu Maliana, munisípiu Bobonaro, kobre uma-kain 79 ne’ebé la tama iha Projetu Eletrifikasaun Nasionál (PEN) 2022.
Koordenadór EDTL,EP munisípiu Bobonaro, Mário de Jesus, informa, uma-kain 79 ne’e la konsege hetan instalasaun enérjia elétrika hosi kompañia Alfamicma, tanba la inklui iha kontratu no Bill Off Quantitave (BOQ) .
Notísia relevante: Enérjia elétrika iha Saburai mate kuaze semana ida ona
“Ida-ne’e kompañia sei labele rezolve, sira submete fali ba iha EDTL mak bele foti medida, entaun iha fulan kotuk ba, dadus ami levanta ona ba leten, ha’u simu tiha despaxu hosi ami-nia prezidente katak, instalasaun ne’e EDTL rasik mak bele jere. Ho ida-ne’e ami prepara tiha ona nia materiál instalasaun, agora iha munisípiu atubele instala ba kliente hamutuk 79,” nia informa ba Tatoli, iha Maliana, tersa ne’e.
Jenerente empreza estatál munisípiu Bobonaro ne’e subliña, materiál instalasaun preparadu ona, maibé tempu ba ekipa mak sei laiha atu halo mobilizasaun ba iha terrenu.
“Tuir loloos horisehik ne’e ami bele ba implementa ona, maibé tanba iha avaria ne’ebé mosu derrepente halo poste hitu mak monu, ne’ebé to’o ohin loron se servisu ne’e mak ami finaliza, ha’u haree laiha tempu, aban ka bainrua ha’u bele dezloka membru sira ba iha fatin refere,” nia katak.
Enkuantu totál uma-kain iha Saburai ne’ebé asesu ona eletrisidade iha tinan ne’e hamutuk 39 mai hosi aldeia Taz-Masak, Aitasi no balu hosi Kosal.
Notísia relevante: AMB sei orienta PNTL atua individu impede projetu eletrifikasaun iha Saburai
Jornalista: Sérgio da Cruz
Editór: Evaristo Soares Martins
