Ema na’in-hitu kanek iha asidente Manduki
BOBONARO, 05 dezembru 2023 (TATOLI)- Iha loron-tersa maizumenus tuku 10:05 ne’e akontese asidente tráfegu bís diresaun Maliana ba Dili ho naran Super ho xapa-matríkula 36.467 TL baku-fila iha área Manduki, aldeia Miguir ,suku Aidabaleten, postu administrativu Atabae, munisípiu Bobonaro.
Iha asidente ne’e la rezulta ema mate, iha de’it ema na’in-hitu mak kanek ne’ebé daudaun ne’e halo hela tratamentu intensivu iha Hospitál Referál Maliana.
Notísia relevante: PNTL Bobonaro husu komunidade mantein pás iha 28 Novembru
“Asidente tráfegu ida-ne’e konsege deteta iha sidadaun timoroan na’in-hitu, ami hetan relatóriu insiál primeiru ne’e feto ida, mane na’in-lima, ida fali ha’u seidauk hetene feto ka mane, sira-ne’e mak hetan kanek, grave ka la gave ne’e doutór sira mak bele dehan, maibé laiha vítima ida mak mate, ne’ebé graças a deus ema ida la mate, sira agora transporta ona mai iha opsitál referál Maliana iha oras 13:15,” Segundu Komandante PNTL munisípiu Bobonaro, Asistente Superintendent, Fásio de Jesus Lima, ko’alia iha Maliana.
Nia subliña, hafoin akontesimentu, motorista ho inisiál AML idade 23 entrega-an kedas ba F-Forsa Defeza Timor-Leste (F-FDTL) postu Manduki hafoin ne’e lori kedas ba asegura iha eskuadra Polísia Atabae.
Daudaun ne’e Polísia Tránzitu Munisípiu Bobonaro tún ona ba terrenu hodi halo ezaminasaun ba lokál akontesimentu atu kompleta relatóriu no motivu hosi akontesimentu ne’e.
“Relatóriu insiál tanba ita-nia kondutór lori transporte ho velosidade ida-ne’ebé másimu, lakon kontrolu entaun halai tún mai, distánsia ida tunba ne’e depois sira sukat tiha mak hafoin ita hatene ninia metru hira,” nia katak.
Notísia relevante: PNTL Bobonaro detein ema na’in-rua kontra regra eleisaun
Jornalista: Sérgio da Cruz
Editór: Evaristo Soares Martins
