DILI, 05 dezembru 2023 (TATOLI) – Unidade Estudante no Juventude Suku Manelobas (UNEJUSMA), postu Administrativu Maubisse, munisipiu Ainaro, sujere ba Governu atu hadi’a infraestrutura bázika, hanesan área saúde, edukasaun, estrada no ligasaun eletrisidade ba populasaun iha suku refere.
“Ita nia estudante sira la’o distánsia do’ok liu kilometru ida hodi bele to’o iha estabelesimentu eskolár no populasaun mós la’o distánsia do’ok hodi asesu ba merkadu, kanalizasaun bee ba komunidade liuliu liña eletrisidade no estrada”, Portavoz UNEJUSMA, Martinho da Conceição Soares, liuhusi Konferénsia Imprensa iha Colmera-Dili.
Estudante Universitáriu sira ne’e mós Ministériu Saúde tenke tau sentru saúde ida iha suku Manelobas hodi bele halo atendimentu ba ema moras sira tanba profisionál saúde sira uza komunidade nia uma fó antendimentum bainhira halo vizita ba populasaun.
Portavóz mós husu ba Ministériu Agrikultura atu fó atensaun ba foinsa’e sira ne’ebé kria grupu komunitária hodi investe iha área agrikultura no aqukultura.
UNEJUSMA mos sujere ba populasaun liuliu foinsa’e, inan aman, veteranu no inteletuál atubele kolabora ho xefe suku eleitu foun iha suku atubele dezenvolvimentu suku.
Portavoz refere ba xefe suku foun suku Manelobas, Julião Pereira ne’ebé eleitu ba periodu 2023 to’o 2030 nu’udar ex-sekretáriu jerál UNEJUSMA tanba ne’e mak hakarak husu bele dezenvolve suku iha setór sira ne’ebé mensiona ona.
UNEJUSMA apresia mós prezensa xefe suku foun tanba populasaun fó fiar hodi hili sai xefe suku atu dezenvolve suku Manelobas.
Iha biban ne’e, Prezidente UNEJUSMA, Damião Pacheco, reforsa populasaun iha suku porsentu 25 seidauk asesu ba liña eletrisidade husi Eletrisidade de Timor-Leste.
“Totál populasaun hamutuk 861 agregada familiár husi númeru ne’e porsentu 75 hetan ka asesu ba eletrisidade no porsentu 25 seidauk”, nia relata.
Jornalista: Jesuína Xavier
Editór : Florencio Miranda Ximenes
