Empreza Sulibere abandona projetu melloramentu bee-moos iha Soba
DILI, 06 dezembru 2023 (TATOLI)–Xefe suku Soba, postu administrativu Laga, munisípiu Baucau, Francisca Monica de Jesus Soares, hateten empreza Sulibere Unipesoál, Lda, abandona projetu melloramentu bee-moos ba komunidade iha suku Soba.
Tuir nia, VIII Governu Konstitusionál fó fiar ba empreza refere ho nia orsamentu hamutuk $221829,25 ne’e, hahú hosi tempu antigu Primeiru-Ministru, Taur Matan Ruak, lansa primeira pedra.
“Ha’u hakarak hato’o liuhosi mídia nune’e ministériu relevante haree no hatene, nune’e bolu na’in ba empreza ne’e hodi husu justifikasaun tanbasá mak abandona projetu ne’e. Tanba projetu ne’e la’ós hosi postu ba munisípiu maibé nasionál mak implementa iha ne’eba, ne’e, Bee Timor-Leste nian,” Xefe suku Francisca Monica de Jesus Soares hateten ba Agência Tatoli, hafoin partisipa iha konferénsia nasionál no selebrasaun PNDS ba dala-10, iha Sentru Konvensuan Dili (CCD), tersa ne’e.
Melloramentu bee-moos iha postu administrativu no suku Soba ne’e iha bee boot loos no hein empreza halo melloramentu de’it, maibé iha implementasaun sai defisil tebes.
Bee-matan ne’e Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, IP, sigra portugés) mak kee ho nia naruk metru 80.
Bee ne’e boot no kapas tebes maibé atu dada hodi aumenta bee-moos ne’ebé komunidade konsumu daudaunj ne’e mak empreza refere abandona hela projetu ne’e.
Tanba ne’e, husu atu buka hatane tuir tanba osan povu nian no tenke fó benefísiu ba povu no ezekuta ne’e tenke ho loloos, labele abandona fali projetu ne’e.
Jornalista : Osória Marques
Editór : Cancio Ximenes
