VIQUEQUE, 06 dezembru 2023 (TATOLI)—Governu liuhosi Ministériu Turizmu no Ambiente (MTA), kuarta ne’e, inaugura sítiu turístiku jornada rezisténsia tolu no jandín eroi ida lokaliza iha suku Loi-Hunu, postu administrativu Ossu, munisípiu Viqueque, hafoin hetan apoia fundu reabilitasaun iha tinan 2022.
Diretór Jerál MTA, Jelino Soares, hateten, parte ministériu halo akordu ho Ministériu Asuntu Kombatente Libertasaun Nasionál hodi haree fatin istóriku sira iha parte Leste atu dezenvolve, nu’udar projetu pilotu ba turizmu komunitáriu.
“Ha’u sente kontente tanba sítiu turíztiku Uasadiga, antes ne’e inisiativa hosi veteranu sira maka konstrui uluk. Depois foin lalais iha VIII Governu nia mandatu maka fó apoia orsamentu hodi halo reabilitasaun ba sitíu fatin haat iha postu Ossu. Ida-ne’e hanesan inisiativa ida di’ak, iha fatin hotu-hotu ita planu no tau orsamentu, mabé bainhira laiha inisiativa implementasaun, ita sei hasoru problema,” Jelino Soares, dehan hafoin ramata serimónia inaugurasaun sítiu turíztiku Uasadiga, kuarta ne’e.
Nune’e, nia fó hanoin ba jerasaun foun sira hodi hatutan obra istóriku hosi as’wain rezisténisia sira hodi hato’o istória lolos.
“Ami sei kontinua serbisu hamutuk ho autoridade sira hodi dezenvolve setór turizmu sira-ne’ebé iha ita-nia nasaun atu fó retornu ba Estadu,” nia akresenta.
Notísia relevante : Sítiu istóriku Jornada Rezisténsia Edimumu Uatulari hahú fase konstrusaun
Iha fatin hanesan, Xefe Estadu Maiór Jenerál FALINTIL-Forsa Defeza Timor-Leste (F-FDTL) Tenente Jenerál, Domingos Raul ‘Fauor Rate Laek’, agradese ba Governu ne’ebé apoia ona fundu hodi halo reabilitasaun sítiu turíztiku, ne’ebé hanesan abrigu Uasadiga, nune’e bele habelar nafatin istória luta ba libertasaun Timor Leste.
“Uluk ha’u hahú inisia ba abrigu Osadiga ne’e, veteranu balun dehan ba ha’u, Estadu maka halo, maibé momentu ne’ebá ha’u dehan ba veteranu sira katak Estadu la halo tanba iha prioridade barak ba nasaun no la’ós tau-matan hotu ba ita-nia diresaun sira. Inisiativa ne’e ho objetivu atu ema labele inventa istória tanba bainhira ami laiha ona, ema sei inventa istória sira, tanba ne’e maka dezenvolve abrigu Uasadiga sai sítiu turíztiku,” nia tenik.
Falur dehan, istória la’ós ema ida ka rua maka halo, maibé istoria koletivu, vitória susesu ba koletivu rai Timor-Leste, tanba ne’e ema labele invente istória.
“Prezensa Ministériu Turizmu iha serimónia ida-ne’e hodi fó rekoñesimentu ba sítiu turíztiku. Tanba setór turizmu sai fonte reseita alternativu hodi sustenta mákina Estadu sira tanba agora ita dependénsia ba fundu petrolíferu,” nia realsa.
Falur Rate Laek konsidera turizmu sai hanesan indústria hodi fó reseita ba Estadu tanba sei daudaun Estadu garante fundu petrolíferu.
“Nasaun sira hanesan Sigapura laiha rekursu mina, sira garante ba turizmu. Nune’e ba oin ita mós tenke hahú hanoin dezenvolve turizmu iha ita-nia rai atu ita labele depende loos ba mina tanba mina loron-ida sei maran, maibé turizmu sei la hotu,” nia hato’o.
Koodenadór Grupu Bua Malu, Cândido Henrique da Silva ‘Daiwari’, haktuir, Grupu Bua Malus maka hanesan responsável ba sítiu haat iha postu Ossu, nune’e ministériu prevee orsamentu hamutuk $49.730 liuhosi transferénsia públika hodi reabilta sítiu tolu no jardín eroi ida.
“Durante prosesu kontrusaun ami hasoru dezafiu barak tanba distánsia dook nune’e materiál reabilitasaun tenke lalin de’it maka sa’e bá foho leten. Maibé, ikus mai ami konsege finaliza sítiu hosi fatin haat ne’e,” nia realsa.
Konstrusaun hahú loron 11 novembru 2022 no finaliza 06 dezembru 2023. Fasilidade iha sítiu Uasadiga mak hanesan uma ba rekolla billete, dada bee-moos, eskada liga foho Uasadiga hamutuk haat, sanitária rua, sinál risku, sinál turista, fatin lixu, iha sítiu jardín eroi Luca-oan kria morru protesaun, fatin deskansa, sanitária no dada bee-moos no sítiu Labalou dada bee-moos no hadi’a fasilidade sira seluk.
Serimónia ne’e partisipa hosi Prezidente Konsellu Veteranu munisípiu Viqueque, Autoridade komunitária,Autoridade Turizmu Timor Leste (ATTL), Komandante Polísia Nasionál Timor-Leste (PNTL) munisípiu Viqueque, inklui abitante lokál.
Jornalista : Vitorino Lopes da Costa
Editora : Julia Chatarina
