Kria suku foun presiza populasaun tenke 3.000 ba leten
DILI, 06 dezembru 2023 (TATOLI)–Ministru Administrasaun Estatál (MAE), Tomás do Rosário Cabral, hateten atu kria suku foun mak tenke iha populasaun 3.000 ba leten no rai ho tradisaun laiha problema.
“Atu kria suku presiza kritériu tolu mak iha rai, lisan no populasaun. Populasaun tenke 3.000 ba leten. No kultura tenke iha unidu no laiha problema entre kultura ida ho seluk nian,” Ministru Tomás Cabral hateten iha konferénsia nasionál no selebrasaun PNDS ba dala-10, iha Sentru Konvensuan Dili (CCD, sigla portugés), tersa (05 dezembru 2023) ne’e.
Kria suku barak maibé tenke haree mós ba kustu finanseiru, tanba bainhira poder lokál la’o ne’e, munisípiu iha kapasidade atu hetan osan ka lae.
“Se aban bainrua mak Orsamentu Jerál Estadu fó de’it 20% entaun oinsá. Problema, ita bele loke suku foun maibé munisípiu mak iha responsabilidade, tanba ne’e presiza haree ba kapasidade,” nia dehan.
Nune’e, nia dehan, mezmu komunidade hatama karta ba parte relevante maibé ida-ne’e la’ós deside agora tanba sei presiza haree mós kustu finanseiru.
Jornalista : Osória Marques
Editór : Cancio Ximenes
