FOKUPERS preokupa deputadu hetan subsídiu maibé povu sei moris mukit
DILI, 11 dezembru 2023 (TATOLI)—Diretora Forum Komunikasaun ba Feto Timor Lorosa’e (FOKUPERS), Maria Fátima Perreira Guterres, hateten FOKUPERS preokupa tebes tanba reprezentate povu iha uma fukun Parlamentu Nasional (PN) hakarak hetan subsídiu maibé la haree ba povu barak ne’ebé sei moris mukit.
“Sei mosu injustisa sosiál no povu barak sei moris susar nia-laran, tanba ne’e deputadu sira iha Parlamentu Nasional hakarak hetan subsídiu ba-aan tenke tetu didi’ak lai antes foti desizaun ba-aan rasik. Deputadu sira presiza refleta fila-fali, haree didi’ak ba asuntu sira boot atu asegura. Katak, povu Timor-Leste nia bem estar ne’e aseguradu duni molok sira hanoin ba sira nia-aan ho osan ne’ebé benefísia sira-nia aan, inklui mós ho regalias sira liuliu benefísia ba transporte no mós saúde,” nia dehan ba jornalista sira hafoin halo mídia briefing kona-bá Orsamentu Sensivél ba Jéneru (OSJ), iha Palpaso, segunda ne’e.
FOKUPERS triste tebes tanba iha situasaun sira hanesan nu’udar injustisa sosiál sei mosu maibé deputadu sira hakarak ona atu hetan subsidiu.
Maibé, nia dehan, realidade ne’ebé mak iha kona-ba hahan vítima sira iha uma mahon inklui mós ema ho defisiénsia, orfonatu sira asesu subsídiu mak $1.50 ba ema ida loron ida.
“Sira ida-ne’ebé aloka orsamentu ne’e ba nia-aan rasik no matabixu nian de’it liu ona $5. Agora $1.50 ne’e inklui hotu ona matabixu, han meudia no mós han kalan nian. Entaun alokasaun sira la sensivél, ezemplu ida mak akompañamentu ba vítima sira só bele aloka orsamentu ba ema na’in 10 to’o 15 iha tinan ida-nia laran. Maibé haree ba númeru vítima liu tiha ona na’in-50,” nia esplika.
Antes ne’e mós Prezidente Repúblika (PR), José Ramos Horta, preokupa ho subsídiu saúde no transporte ba deputadu sira, ne’ebé aprovadu iha Parlamentu Nasionál (PN).
“Ha’u haree ne’e boot tebes, Estadu iha ona Orsamentu Jerál Estadu kada tinan ba saúde, ema ida kuandu moras kualker sidadaun atu Deputadu fali, atu membru Governu fali bele ba halo tratamentu iha rai-li’ur. Maibé atu fó $600.00 kada fulan ba deputadu ida hodi halo tratamentu saúde be osan sira prevee kada tinan iha Ministériu Saúde no Ministériu Solidaridade Sosial ne’e Oinsa,” nia dehan.
Jornalista : Osória Marques
Editór : Cancio Ximenes
