STAE hahú sinkroniza dadus eleitór iha territóriu nasionál
DILI, 12 dezembru 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten STAE hahú ona halo sinkronizasaun ba dadus eleitór iha territóriu nasionál, entaun daudaun ne’e suspende provizória atividade resensiamentu eleitorál.
“Ita hahú ona halo sinkronizasaun ba ita-nia dadus eleitór iha territóriu nasionál tanba tama ona ba tinan ne’e nia rohan. Ita sei anúnsia rezultadu sinkronizasaun dadus eleitór ba públiku no ba partidu polítika, entaun ita tenke suspende resensiamentu eleitorál ne’e,” Acilino Manuel Branco hateten ba Agência Tatoli, iha nia kna’ar fatin Caicoli, tersa ne’e.
Dadus eleitór iha Timor-Leste hamutuk ema na’in-893.838 ne’ebé kompostu hosi feto hamutuk 464.400 no mane hamutuk 429.438, maibé ida-ne’e inklui mós ho eleitór foun sira.
Hosi númeru 893.838 ne’e, eleitór sira-ne’ebé hela iha diaspora ne’e hamutuk 1.853 no iha rai – laran ne’e hamutuk 58.756.
Hosi totál eleitór hirak ne’e kompostu hosi munisipiu Aileu hamutuk 35.128, Ainaro 48.185, Ataúro 4.288, Baucau 99.724, Bobonaro 72.951, Covalima 49.469, Dili 191.450, Ermera 85.593, Lautém 49.577, Liquiça 53.286, Manatuto 36.651, Manufahi 42.310, RAEOA 54.645 no Viqueque 58.756.
Eleitór sira-ne’ebé rejista iha diáspora hanesan iha Austrália ne’e eleitór hamutuk ema na’in-2.243, Korea Súl hamutuk na’in-1.595, Inglatera hamuutk na’in-3.716, Irlandia Norte hamutuk na’in-2.418 no Portugál hamutuk ema na’in-1.853.
Jornalista : Osória Marques
Editór : Cancio Ximenes
