Xefe Estadu entrega karrosa ba feto 10 halo negósiu kiik
DILI, 14 dezembru 2023 (TATOLI)—Xefe Estadu, José Ramos Horta, entrega karrosa ba feto na’in-10 hodi fasilita sira halo negósiu kiik.
“Ema na’in-10 ne’ebé simu, sira-ne’e hili ona nu’udar manán-na’in iha programa kontribuisaun kompetitivu ida-ne’ebé apoia hosi UN Women iha kolaborasaun ho Asuntu Empoderamentu Feto Palásiu Prezidensiál. Aplikante sira kria vídeo dokumentáriu badak ne’ebé hatudu sira-nia ideia negósiu no oinsá kapitál adisionál bele ajuda dezenvolve sira-nia empreza. Ha’u apresia feto sira ne’ebé uza sira-nia kakutak no laran atu halo negósiu iha dalan kreativu,” Xefe Estadu hateten iha Palásiu Prezidensiál, Bairru Pite, Dili, kuarta ne’e.
Prezidente Repúblika hateten, ninia vizaun ba vendedór sira iha Timor-Leste atu fó apoiu no jere didi’ak no benefisiáriu -nain ida-idak simu karrosa ba negósiu ne’ebé dezeña ho kostume hodi fó espasu inventáriu no fa’an sira-nia produtu.
“Asisténsia ne’e ho objetivu atu haforsa dezenvolvimentu emprezariál ne’ebé lidera hosi feto no hametin auto-sufisiénsia ekonómika ba uma-kain sira-ne’ebé simu,” nia hateten.
Jornalista : Osoria Marques
Editór : Cancio Ximenes
