PAM Bobonaro lansa projetu pilotu kuda hare ho sistema MARKUFID
BOBONARO, 15 dezembru 2023 (TATOLI) – Prezidente Autoridade Munisípiu Bobonaro, Ernesto de Oliveira Barreto, sesta ne’e halo lansamentu ba projetu pilotu hosi Kooperativa Lakon Nakukun Mosu Naroman (LANAMONA) kona-bá implementasaun kuda hare ho Sistema Materiál Kuda Fini Direita (MARKUFID) ne’ebé grupu agrikultór Alargi Green Pro iha área Humangkou, suku Tapo-Memo, postu administrativu Maliana.
Autóridade Munisípiu Bobonaro ne’e, konsidera insiativa kopoerativa LANAMONA bele sai ezemplu di’ak ida atu fó moris ba agrikultór no natár sira iha munisípiu ne’e.
Notísia relevante: Grupu kooperativa LANAMONA iha kapitál millaun $1-resin hosi membru 2.120
“Ne’e bele ajuda hamenus kustu, halo preparasaun ba natar, agora ida bainbain bee ita halo ne’e, hoban tiha hasa’e, habai, ba halo bibit, depois fokit, lalin, depois kuda, nia prosesu kleur.” Nia hateten.
Líder másimu iha munisípiu Bobonaro ne’e apela ba estensionista agrikultura sira atu habelar informasaun ne’e ba komunidade sira hotu kona-bá utilizasaun sistema refere.
“Ha’u sei kontrola, ezemplu ida-ne’e suku ne’ebé mak halo, ha’u mós sei halo vizita traballu ba suku Memo, Ritabou, Holsa, Odomau, Raifun no Lahomea ne’ebe iha natar, atu ko’alia ho sira kona-bá ezemplu ida-ne’e, atu sira bele halo tuir,” nia dehan.
Prezidente LANAMONA, Domingas dos Santos, esplika, inisiativa kria materiál refere atu hamenus kustu ne’ebé agrikltór sira hasai ba halo natár no to’os no fasilita agrikultór sira badinas halo natar hodi hasa’e produsaun agríkola rai laran.
“Ita hasa’e nia kuntidade, entaun ema ida nia natar ektare ida, nia mesak ona, nia kuntidade iha nia fa’an, sorin hela ba haan, maibé kuandu servisu todan ne’ebé tenke lisuk, entaun hare ektare ida ema na’in-rua tenke fahe hanesan, nia atu fa’an mos labele ona, hela de’it oituan, dalaruma haan deit mós la too,” nia katak.
Reprezentante Diretór Servisu Munisipál Agrikultura Munisípiu Bobonaro, Justino Belo, konsidera liuhosi inisitiva ne’e bele ajuda governu hadi’ak liután setór agrikultura no motiva agrikultór halo natar.
“Ami prontu koopera, bainhira imi husu ajuda ruma, tékniku posibilidade ajuda pestisida, adubu ruma hodi bele atende ita-boot sira hodi dezenvolve imi-nia atividade no kontribui ba dezenvolvimentu nasaun nian,” nia akresenta.
Projetu pilotu ne’e halo iha natar ektare tolu resin, ne’ebé terjeitu kada époka sei kolleta mínimu dala-rua no másimu dala-tolu, iha fatin ne’e mos grupu Alargi Gren Pro sei kuda mos fore-mungu, batar Kayrala no ortikultura.
Notísia relevante: Kooperativa LANAMONA hakarak harii banku iha kada suku
Jornalista: Sergio da Cruz
Editór: Evaristo Soares Martins
