Reabilitasaun estrada rejionál hosi Oébaha ba Bitopa Oésilo atinje 50%
OÉ-CUSSE, 15 dezembru 2023 (TATOLI – Projetu reabilitasaun estrada rejionál iha sub-rejiaun Oésilo hosi aldeia Oébaha, suku Bobometo liga ba ponte Bitopa, aldeia Buqui, suku Usitasa’e, daudaun ne’e atinje ona 50%.
Diretór Rejionál Infraestrutura, Candido dos Reis Amaral, informa, projetu ne’e hatuur fatuk dahuluk iha loron 18 jullu 2023.
Objetivu hosi reabilitasaun atu tulun komunidade sira iha sub-rejiaun Oésilo, sub-rejiaun Pássabe no Nítibe sorin atu aasesu iha tempu udan tanba liga direita ho ponte Bitopa no ponte Noetoko ba Nítibe nian.
“Reabilitasaun estrada rejionál hosi Oébaha ba Bitopa agora servisu fíziku to’o ona 50%, nia problema maka jestaun gráfiku maibé parte estrada, ita komunika nafatin kompañia atu aselera servisu,” Candido dos Reis Amaral, iha Oé-Cusse, sesta ne’e.
Notísia relevante: RAEOA reabilita estrada rejionál Oebaha liga ponte Bitopa ho kustu rihun $544-resin
Diretór Obra Públika ne’e, esplika, progresu 50% ne’e kompañia halo ona instalasaun sira, dreinazen kuaze remata ona, entaun sira foku ba iha plan konkrit (nahe-simentu).
“Ami hanesan téknika alerta beibeik ba kompañia, ba fulan tolu nia laran atu toma atensaun, no husu ba sira atu halais servisu, tanba agora tama tempu udan, tanba dalan ne’e atu liga komunidade sira mai hosi sub-rejiaun Pássabe, Nítibe sorin no Oésilo rasik, uza asesu ba Pante Makasar,” nia informa.
Purtantu, projetu reabilitasaun estrada rejionál ne’e ho distánsia kilómetru hitu (7) kompañia Irmão Timor Unip Lda ezekuta ho valór $544,055.33 durasaun fulan sia (9), osan ne’e Autoridade aloka hosi Orsamentu Jerál Estadu (OJE) 2023.
Notísia relevante: Joven sira Usitasa’e RAEOA inisiativa ajuda ema no transporte públiku ultrapasa mota Bitopa
Jornalista: Abílio Elo Nini
Editór: Evaristo Soares Martins
