PR Horta loke bazar baratu tulun familia vulnerável festeza Natál
DILI, 19 dezembru 2023 (TATOLI)—Prezidente Repúblika (PR), José Ramos Horta, hateten Palásiu Prezidénsia iha inisiativa loke bazar baratu ba família vulnerável sira hodi festeza natál 2023 no tinan foun 2024.
“Prezidensia Repúblika hamutuk ho Ministériu Komérsiu Indústria (MCI) halo feira iha jardin Palásiu Prezidensiál no faan foos ba ema ki’ak sira ho folin $9 kada kilograma 20. Inisiativa faan foos baratu iha Jardin Palásiu Prezidensiál Bicolau Lobato ne’e atu bele tulun família sira-ne’ebé kiak bele sosa foos durante períodu natal,” PR Horta hateten ba jornalista sira, hafoin halo vizita no fahe prezente natal ba pasiente sira hodi festeza loron natal no tinan foun, iha Ospitál Nasionál Guido Valadares (HNGD, sigla portugés), Bidau, tersa ne’e.
Xefe Estadu ne’e hateten, iha loron dahuluk loke bazar baratu ne’e ema 2.000-resin mak hola foos ho folin baratu.
Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, hateten inisiativa Palásiu Prezidensiál ne’e di’ak maibé asegura seguransa atu bele perturbasaun ba movimentasaun ema ho transporte tanba besik loos dalan ninin.
“Ha’u hanoin inisiativa Prezidente Repúblika di’ak tanba fó esapsu ba família vulnerável bele ba haree no sosa, maibé importante mak tenke iha seguransa nune’e labele halo barrulu iha fatin ne’ebá,” nia dehan.
Jornalista : Osória Marques
Editór : Cancio Ximenes
