Benefisiáriu pensaun sosiál faze daruak na’in-21 iha Samalari seidauk simu subsídiu
DILI, 22 dezembru 2023 (TATOLI)—Xefe suku Samalari, postu administrativu Baucau Vila, munisípiu Baucau, Rui Magno Siqueira, hateten idozu no invalidez na’in-21 hosi totál benefisiáriu 288 iha auku Samalari mak seidauk simu subsídiu ka pensaun sosiál faze daruak nian tanba moras no la’o labele.
Notísia Relevante: MSSI husu benefisiáriu pensaun sosiál hakbesik autoridade lokál hodi konfirma dokumentu
“Ha’u halo ona pedidu ba MSSI ho BNCTL no hatama iha loron 5 dezembru liubá maibé to’o minitu ida-ne’e seidauk iha resposta. Sira na’in-21 hosi totál 283, sira-ne’e moras no iha balun ne’ebé la’o labele, tanba ne’e BNCTL tenke selu iha sira-nia uma,” Xefe suku ne’e hateten ba Agência Tatoli liuhosi telefónika, tersa ne’e.
Autoridade komunitária ne’e husu nafatin ba Governu ne’ebé selu hosi Banku Nasionál Komérsiu Timor-Leste (BNCTL) presiza toma atensaun tanba tinan 2023 ne’e atu ramata ona.
Pagamentu ba idozu no invalidéz iha suku Samalari nian hahú iha fulan-novembru nia rohan, no hirak ne’ebé seidauk simu subsídiu ne’e preszia hetan sira-nia direitu hodi bele festeze Natál 25 dezembru 2203 no Tinan Foun 01 janeiru 2024 ne’ebé atu mai daudaun.
Dadus benefisiáriu ba pensaun sosiál faze daruak iha munisipiu Baucau ne’e hamutuk 14.446 ho totál alokasaun orsamentu hamutuk $ 2.600.280, ne’ebé kompostu hosi idozu hamutuk 12.354 ho totál orsamentu S 2.223.720 no invalidéz hamutuk 2.092 ha orsamentu $376.560.
Jornalista : Osória Marques
Editór : Cancio Ximenes
