Baskolante baku-fila iha Subida Ilibole Oeleu, ema na’in haat kanek
BOBONARO, 23 dezembru 2023 (TATOLI) – Iha loron sábadu maizumenús madrugada tuku 05:00 Otl, akontese asidente tráfegu baskolante ho naran Mucumau Mócul ho Xapa matríkula A.54.189 monu ba kanu koak iha dalan subida área Hola Ilibole, suku Oeleu, postu administrativu Bobonaro, Munisípiu Bobonaro.
Kareta refere mai hosi dirasaun Dili tula ema na’in 10 resin inklui sasán balun ho objetivu atu bá Oeleu, maibé seidauk to’o fatin destinasaun hetan asidente tanba sa’e subida Holak Ilibole labele, to’o klaran tún fali bá kotuk hodi riba tama kanu-koak.
Tuir informasaun ne’ebé Agência Tatoli rekolla katak asidente ne’e rezulta ema na’in haat, motorista inklui labarik ki’ik ida mak hetan kanek kamaan. Ema hirak ne’e evakuadu ona bá Sentru Saúde Bobonaro Vila hodi hala’o tratamentu saúde.
Tuir observasaun jornalista Agência Tatoli iha terrenu nota katak asidente hamosu engarrafamentu ba transporte públiku dirasaun Maliana-Bobonaro-Lolotoe no daudaun ne’e komunidade suku Oeleu buka hela solusaun atu hasa’e filafali karete refere husi baleta laran.
Jornalista: Sergio da Cruz
Editór: Evaristo Soares Martins
