Komandu PNTL rekoñese susar kontrola fronteira tanba menus rekursu umanu

DILI, 28 dezembru 2023 (TATOLI) – Xefe Departamentu Investigasaun Kriminál (DIK) Nasionál Superintendente Polísia, João Belo dos Reis, hateten Komandu PNTL rekoñese susar atu kontrola fronteira hosi atividade tranzasaun illegal no ema tama no sai ilegál tanba menus rekursu umanu.
Nia dehan, maske komandu enfrenta dezafiu no difikuldade oioin espesialmente rekursu ne’ebé limitadu, maibé UPF jere rekursu ne’ebé mak iha hodi kontinua fó seguransa másima iha liña fronteira.
“Ami la nega katak ami iha frakeza iha rekursu umanus no edukasaun ne’ebé mak menus. Maibé ho limitasaun ne’ebé mak ami iha la hamate ami-nia servisu hanesan ajente ne’ebé garante seguransa iha liña fronteira”, João Belo, dehan ba jornalista sira iha Komandu Jerál PNTL, Caicoli, ohin.
“Ita konsege kaptura no balun la konsege liuhosi atividade ilísitu sira no movimentu ilegál iha zona fronteira no balun ita la konsege deteta hodi kaptura tanba iha zona fronteira iha dalan barak”, nia subliña.
Nia esplika, Timor-Leste no Indonézia iha área fronteira ne’ebé luan tebes inklui mós parte tasi, tanba ne’e mak kuandu ema importa sasan liuhosi marítima no terestre, UPF mós la konsege no dala barak sasan sira ne’e mai tiha Díli mak autoridade polisiál foin halo apreensaun tanba área luan no UPF iha limitasaun rekursu umanu.
“Ita bo’ot sira hatene dala barak ema dehan nusa mak UPF labele prevene fugetes ne’ebé tama hosi fronteira, dala barak UPF halo servisu hodi prevene buat sira ne’e hotu no dala ruma mós lae, tanba ita-nia rekursu ne’ebé menus inklui ita nia área fronteira ne’ebé luan, ne’ebé fó impaktu ba ita atu labele kontrola hotu, tanba ne’e buat sira ne’e mosu”, nia afirma tan.
Belo rekoñese katak dala ruma kazu tranzasaun ekonómiku no kazu ilísitu sira sempre mosu barak iha fronteira tanba pesoál balun ne’ebé koloka iha fronteira la sériu bainhira halo servisu .
“Ita labele hateten seguransa fronteira sei fraku. Seguransa di’ak hela. Individu idak-idak ne’ebé ho nian interese rasik mak sempre uza meiu hothotu atu bosok hodi hatama sasan sira ne’e tuir sira nia interese”, nia refere.
Tanba ne’e, Belo husu ba entidade hotu, nomeadamente PNTL, Alfándega. Kuarentena no sidadaun hotu atu kontribui hodi kontrola no prevene movimetu ilegál no sasan ilísitu.
“Ami husu ba komunidade no entidade hotu ne’ebé responsavél iha fronteira atu servisu ho fuan no laran ba Timor-Leste hodi hadok aan hosi ita-nia interese hodi servi de’it ba povu no rai ida-ne’e”, nia konkui.
Notísia relevante : Governu planeia rekruta membru PNTL-UPF foun 100 iha 2024
Governu iha inisiativa hadi’a no moderniza kondisaun UPF
Presiza aumenta postu vijilánsia no membru UPF kontrola fronteira
Jornalista: Natalino Costa
Editór : Zezito Silva

