ME sei envolve estudante UNTL iha dezenvolvimentu edukasaun
DILI, 28 dezembru 2023 (TATOLI) – Minstériu Edukasaun (ME) sei servisu hamutuk ho Universidade Nasionál Timor Lorosa’e (UNTL) hodi envolve estudante finalista mellór klasifikadu na’in sanulu (10) atu apoiu servisu edukasaun iha terrenu.
“Ami agora halo hela prosesu diskusaun ida iha ministériu hamutuk ho dirijente sira hotu tanba ami iha planu atu foti estudante finalista mellór klasifikadu husi UNTL hamutuk na’in sanulu atu mai servisu ho ami hodi apoiu edukasuan iha terrenu,” Ministra Edukasaun, Dulce de Jesus Soares hateten iha serimónia lansamentu livru ho títulu “O conhecimento e um fator importante para o desenvolvimento em todos os países do mundo, incluindo em Timor-Leste”, iha Centro Nasionál Chega, Balide, kinta ne’e.
Nia dehan fakuldade ne’ebé ministériu sei konvida atu mai servisu hamutuk hodi dezenvolve edukasaun mak Fakuldade Edukasaun UNTL.
“Ha’u hakarak hateten katak Ministériu Edukasaun hakarak hakat bá-oin ita tenke envolve ita-nia oan sira ne’ebé mak akaba ona sira-nia estudu iha universidade sira tantu iha rai-laran no mós rai-li’ur, maibé tenke hetan kategoria estudante ho kualifikasaun di’ak nune’e bele aselera prosesu edukasaun ida ho kualidade mai husi baze,” nia esplika.
Dulce hatutan katak kualidade edukasaun ne’e refleta maneira lubuk ida maibé dala barak ema haree liubá konstrusaun fízika hanesan aumenta edifísiu no sala aula eskola sira maibé ema ladún fó atensaun ba kualidade profesór sira.
Governante ne’e esklarese katak molok tinan lima ne’e ramata, IX Governu Konstitusionál sei halo mudansa ruma iha setór edukasaun Timor-Leste hodi kontinua tau atensaun ba profesór sira ne’ebé mai ho memória foun atubele garante prosesu aprendizajen ba estudante sira iha kada eskola.
Jornalista: Tomé Amado
Editór: Rafael Ximenes de A. Belo
